Театр өмірі, тек опера, балет, концерттермен шектелмейді. Өнер ордасында бірқатар әлеуметтік жоба іске асырылып, елорда мектептерімен ауқымды жұмыстар жүргізіліп, сахна сыртындағы шығармашылық өмірге де саяхат ұйымдастырылуда. Осы орайда «Достар клубын» құру мәдени әрі танымдық іс-шаралардың санын көбейтетінін анық көрсетіп отыр.
Айта кетейік, клубқа ену рәсімі өте оңай: кез келген көрермен өтініш-сауалдаманы толтырып, ол мақұлданып, жарна төленгеннен кейін, театр досы «Дос», «Құрметті дос», «Әріптес», «Демеуші» секілді мүшелік санатына қарай берілетін жеңілдіктер туралы мәліметтері бар атаулы клуб картасын алады.
– Мұндай бірлестіктер әлемге танымал көптеген театрда бар. «Астана Операның» «Достар клубына» мүше болуы жұмбақ театр әлеміне жақындай түсуге, оның өміріне белсенді араласуға, сондай-ақ еліміз бен қаламыздың мәдени игілігін арттыру, сақтау ісіне өз үлесіңді қосуға мүмкіндік береді, – дейді «Астана Опера» директорының орынбасары Айжан Құрманғалиева. – Біздің бастамамызға үн қатқан барша жанға үлкен алғысымды білдіргім келеді. Театр мен көрермендердің өзара тиімді ынтымақтастығы өнерді қадірлейтіндерге сырттан бақылап тұрушы ғана емес, сонымен бірге театрдың жобалары мен бағдарламаларының белсенді қатысушысы болуға жағдай жасайды.
«Театр досының» жеңілдіктері қатарына жеке менеджерінің болуы, басты дайындықтар мен эксклюзивті іс-шараларға шақыру билетін алу мүмкіндігі, репертуарлық жоспардың ашықтығы, сахна сыртына саяхат жасау секілді басқа да артықшылықтар кіреді.
Бұдан бөлек, «Құрметті дос» атағы қойылымдық топ мүшелерімен жеке таныстық, қолтаңба алу түріндегі эксклюзивтерге мүмкіндік береді.
Ал «Әріптес» пен «Демеушінің» артықшылық аясы бұдан да кең. Олар ресми кездесу өткізу, қол қою үшін театр ғимаратын пайдалану, жылына екі рет афишаларда өз логотиптерін орналастыру секілді басқа да құқықтарға ие.
