Іссапар барысында мәжілісмендер құрылысты жүргізген «ҚазМұнайҚұрылыс» ЖШС өкілдерімен кездесіп, жаңа нысанға қатысты маңызды мәселелерді талқылады. Жаңа нысанның жалпы құны 198 млн 675 мың теңгеге бағаланып, 173 млн 290 мың теңгеге келісімшарт жасалған болатын. Құрылыс жұмыстары шілде айының соңында толығымен аяқталып, нысан тамыз айының басынан бастап ауыл халқының игілігіне беріледі. 25 адамды қабылдауға арналған амбулаторияда техникалық қызметкерлерді қоса есептегенде 5 адам еңбек етпек.
Мәжіліс депутаты Мейрамбек Төлепберген бұл Amanat партиясының 2021-2025 жылдарға арналған «Өзгерістер жолы: Әр азаматқа лайықты өмір!» атты сайлауалды бағдарламасын іске асыру жөніндегі Жол картасы аясында бой көтеріп жатқан әлеуметтік нысан екеніне тоқталды. Құрылыс жұмысының сапасы мен жоспарлы уақытта аяқталуы депутаттардың бақылауында екенін жеткізді.
Ал аудан әкімдігі дәрігерлік амбулаторияның бұрынғы ескі ғимаратын тұрғын үй ретінде қайта жасақтап, ауыл дәрігерлерін баспанамен қамтамасыз етуге құлшынып отыр.
«Аудандарды аралап жүрген кезде көптеген жастармен кездестік. Ішкі саясат бөлімдеріне қарасты «Жастар ресурстық орталықтарында» еңбек ететін қыз-жігіттердің жалақысы мардымсыз екенін аңғардым. Сол себепті жергілікті атқарушы билік өкілдері «Дипломмен – ауылға» бағдарламасынан тыс келген жастарды да жұмыспен қамту мәселесін шешуі керек. Өйтпесе болмайды», дейді М.Төлепберген.
Жамбыл облысы
