Нұр-Сұлтан қаласының Жұмыспен қамту және әлеуметтік қорғау басқармасы басшысының орынбасары Ерлан Нұрланұлы қала бойынша жұмыссыздар саны 6 500 адам екенін, оның 20 пайызын 29 жасқа дейінгі жастар құрайтынын атап өтті.
«Бүгінгі жәрмеңке жұмыс берушілерге де, жұмыс іздеушілерге де өте пайдалы. Себебі әркім өзінің қалағанын бір алаңнан, бір ортадан табуға мүмкіндік туып отыр. Біз жылдың соңына дейін осындай сипатта әлі бірнеше жәрмеңке ұйымдастыруды көздеп отырмыз», деді ол.
Биыл жұмыспен қамту орталығы 18 жәрмеңке өткізген, жыл соңына дейін тағы осынша өткізу жоспарлап отыр.
«Қаламызда өтіп жатқан осындай іс-шаралар жастардың тұрақты жұмысқа орналасуына оң ықпалын тигізетіні анық. Себебі жұмыс іздеуші жас маман жұмыс беруші тараппен тікелей және бетпе-бет жолығуына мүмкіндік бар. Өзі туралы айтып, өзі қалаған мамандық туралы толықтай ақпарат алуына да жағдай жасалған. Және де жәрмеңкеге келген жастар жұмыс беруші мекеменің қоятын талаптарымен танысып, мамандығының қыр-сырына үңіледі. Болашақ өмірін бағдарлайды. Сол сияқты жұмыс ұсынушы компания да жас түлектің еңбекке деген ынтасы мен білімін байқап, кеңірек диалог құра алады. Менің ойымша осындай жәрмеңкелер қаламызда жиі ұйымдастырылуы керек», деді жас түлек Бауыржан Нұрғалиев.
Жәрмеңкеге арнайы келген жеке кәсіпкер Мейрам Әбдірахманов өзінің жиһаз шығаратын кәсіпорнына екі қызметкер іздейтінін, егер жас мамандардың жұмысқа деген ынтасы болса, әрі қарай өсіп-өркендеуіне қолдау білдіретінін айтты.
«Бүгін Нұр-Сұлтан қаласы әкімдігінің қолдауымен ұйымдастырылған шараға келіп отырмын. Біздің жеке кәсіпкерлігіміздің атауы – «Төрт ағайынды». Негізгі жұмысымыз – жиһаз жасау. Сондықтан маған екі жұмысшы қажет. Біріншісі – дизайнер, екіншісі – жиһаз құрастырушы. Сол екі маманды тапсам деп келіп тұрмын. Негізінен жұмысқа жас мамандар керек. Себебі қазіргі жастардың ойлауы, өмірге, қоғамға деген көзқарасы жаңаша. Жұмысымызға тың бағыт бере ме деген үмітім бар. Біздің тараптан қойылатын негізгі талап – жұмысқа деген ынтасы болса, біз қалғанын үйретіп, оның кәсіби маман болып қалыптасуына көмектесеміз. Кез келген адам маман болып тумайды, уақыт өте келе жетіледі және өз ісінің шеберіне айналады. «Төрт ағайынды» жеке кәсіпкерлігіміз 2020 жылдың қазан айында құрылған. Кішкентай ғана орыннан көлемді кәсіпорынға қадам басып жатырмыз. Жаңадан жеке кәсіпкер болып тіркеліп, жұмыс жүргізіп келе жатқан азаматтар мемлекет тарапынан қандай қолдау барын толықтай білмейді, сол себепті бізде өзімізге берілетін мүмкіндіктерді білу мақсатында осындай іс-шараға келіп отырмыз», деді жеке кәсіпкер Мейрам Әбдірахманов.
Жастарға арналған жәрмеңкемен қатар, кәсіпкерлер үшін Ашық есік күні ұйымдастырылды. Шағын және орта бизнес өкілдері мемлекеттік қолдау бойынша қабылданып жатқан шаралар, оның ішінде банктердің бағдарламалары мен несие өнімдері туралы толық мәлімет алуға мүмкіндік туды. Маусым айының ортасында кәсіпкерлікті дамыту және қолдау аясында елордада мемлекеттік органдар, квазимемлекеттік сектор, «Даму» кәсіпкерлікті дамыту қоры» АҚ, «Атамекен» өңірлік палатасы, екінші деңгейлі банк өкілдері мен кәсіпкерлердің қатысуымен дөңгелек үстел өткен болатын. Кездесу қорытындысы бойынша кәсіпкерлерді мемлекеттік, сондай-ақ жеке несие өнімдерін қолдаудың қолжетімді шаралары туралы қосымша хабардар ету қажеттілігі анықталды. Ашық есік күніне қаланың Инвестициялар және кәсіпкерлікті дамыту басқармасының, халықты жұмыспен қамту орталығының, «Astana» ӘКК, «AstanaInvest» инвестицияларды дамыту орталығының, «Даму» қорының, «Атамекен» ұлттық кәсіпкерлер палатасының, сондай-ақ екінші деңгейдегі банктер мен қаржы ұйымдарының өкілдері қатысты.
Нұр-Сұлтан қаласы кәсіпкерлер палатасының директоры Бейсен Бөгенбайұлы аталған іс-шара кәсібін енді бастаған азаматтарға кеңінен кеңес алуға мүмкіндік беретін таптырмас алаң екенін жеткізді.
«Нұр-Сұлтан қаласы кәсіпкерлер палатасы, кәсіпкерлер басқармасымен бірлесіп арнайы Ашық есік күнін ұйымдастырудамыз. Негізгі мақсат – мемлекет тарапынан қарастырылған қолдауларды жеке кәсіпкерлерге кеңінен түсіндіру. Олардың ішінде қарапайым қағидалардан бастап бизнестің жол картасы, қаржылық ұйымдардың қызметі бар. Өзіміздің кәсіпкерлер палатасынан да бірнеше қызметкер келді. Олардың барлығы ақысыз қызмет көрсетеді. Қазіргі таңда жеке кәсіпкерлер жарты жылдың қорытынды есебін тапсырып жатыр. Мысалы, кіші кәсіпкерлердің жеке бухгалтерлері болмағасын, бүгін біз оларға ақпараттық жағынан көмектесеміз. Қосымша мемлекеттік қолдаулар бойынша оны қалай алуға болады, қай салалар жатады деген сауалдарға жауап беру, кәсіп бастаймын деген азаматтарға жол көрсету мақсатында осындай іс-шара ұйымдастырылып, бірнеше сала мамандарын бір алаңға жинап отырмыз. Пандемия, карантин кезінде шекаралар жабылып, сырттан келетін жұмыс күші тоқтап қалған болатын. Соған байланысты құрылыс саласындағы өкілдерімен сұхбаттасқанымызда құрылысқа мамандар таппай жатқанын айтқан болатын. Нұр-Сұлтан қаласында 70-тен астам оқу орталықтары бар. Ол жерде қысқа мерзімді оқу бағдарламасына негізделген әртүрлі маман дайындалады», деді Б.Бөгенбайұлы.
Инвестициялар және кәсіпкерлікті дамыту басқармасы Кәсіпкерлікті дамыту бөлімінің басшысы Нұржан Әшімов елорда экономикасында орта және шағын бизнестің үлесі 67 пайызды құрайтынын мәлімдеді.
«Біздің мақсатымыз – бұл көрсеткішті одан әрі дамыту және соның негізінде жұмыс істеу. Кәсіп ашқысы келетін азаматтар бізге әртүрлі сұрақпен жүгінеді. Оның ішінде кәсіп ашу үшін не істеу керек, қайда бару керек, мемлекет тарапынан қандай қолдау бағдарламалары бар, екінші деңгейдегі банктердің қандай несиелері бар немесе олардың пайыздық мөлшерлемелері қанша деген сияқты сұрақтар бар. Сондықтан кәсіпкерлер мен тұрғындардың уақытын үнемдеу үшін қаржы ұйымдары мен қала тұрғындарын бір алаңға жинап отырмыз. Бүгін 17 ұйым қатысып отыр. Оның ішінде 12-сі – екінші деңгейдегі банк, 3-еуі – шағын қаржы ұйымы, қалған 2-еуі – несие корпорациясы. Бұл жерде толыққанды кеңес беру, ақпараттандыру жұмыстары жүргізіледі», деді Н.Әшімов.
