Еуразиялық интеграция халықтардың рухани байланыстарын тереңдете түседі

АСТАНА. 29 сәуір. М.В.Ломоносов атындағы Мәскеу мемлекеттік университетінде оқыған дәрісі кезінде Президент Нұрсұлтан Назарбаев экономикалық интеграцияның халықтар арасындағы достық пен мәдени-рухани байланыстарды одан әрі дамытатынына тоқталды. Бұл туралы egemen.kz тілшісі хабарлады. Мәдени байланыстар мен терең достық қарым-қатынастардың экономикаға тигізетін жақсы әсерін, оң ықпалын сөз еткен  Нұрсұлтан Назарбаев:  «ХХІ ғасыр мәдени сегментті ішкі жалпы өнімнің өсуінде қомақты пайыздар әкелетін ұлттық экономикалардың сөзсіз маңызды құрамдас бөлігіне айналдырады. Бұл – туризм, соның ішінде тарихи-мәдени, экологиялық және медициналық туризм. Бұл – инновациялық-индустриялық даму мен басқару жүйесі үшін айрықша маңызды білім беру қызметтері. Бұл – экономиканың көңіл көтеру, спорт сектор және ақпараттық өнім өндірісі. Сонымен бірге, мәдени-гуманитарлық интеграция үдерісінің қандай да бір сегменттің үстемдігінен еуразиялық кеңістіктегі рухани-мәдени алуандылықты жойып жібермеуі де маңызды», – деді. Нұрсұлтан Назарбаев дәріс барысында ұлттық мәдениеттерге құрметпен қарау керектігіне де назар аударды. Ол: «Мен біздің кез келген елімізде мәдениеттің ұлттық мазмұнының эрозиясына жол беруге болмайды деп есептеймін. Сондықтан мүше мемлекеттердің мектептері мен жоғарғы оқу орындарында бір-біріміздің тарихымызды, әдебиетімізді мәдени мұралар мен тілді оқып-үйренуді ынталандырудың маңызы зор», деді. Бұған қоса, Мемлекет басшысы келешекте пайда болуы ықтимал еуразиялық хабар тарату құрылымдары интеграциялық үдеріске қатысатын барлық елдердің мемлекеттік тілдерін қолданғаны маңызды деп есептейтінін айтты. Жолдыбай Базар. Дереккөз: egemen.kz. Фото: Astana-akshamy.kz.