«Орфей мен Эвридика» балеті өзінің сыршыл сазды әуенімен, жүрек пернесін түртіп, сезім сырын шертер нәзік те сұлу музыка мен бидің сәтті үндесуімен ерекшеленеді. Қойылым Сергей Прокофьев, Эдуард Уильям Элгар, Георг Фридрих Гендель, Дэвидсон Джаконелло сынды композиторлардың әсем әуендерімен сүйемелденген. Ал костюм бойынша суретші Деннис Пешкенің сахналық киімдерінде әйгілі мифтің символикасы шынайы көрініс тапса, сценограф Отто Бубеничектің декорациясында тауға ұқсайтын біркелкі емес, айналы геометриялық кескіндер қолданылды. Мұның барлығы спектакльдің шырайын ашып, көркін кіргізгені анық. Дегенмен, ең бастысы, хореография мен астаналық театр әртістерінің шеберлігі көрерменін айрықша тәнті етті.
– Сахнадағы әрекет – шығармашылық қиялдың жемісі ғой. Сондықтан да мен өзімнің қойылымдарыма үнемі грек мифологиясының кейіпкерлерін кіріктіргенді ұнатамын. Әйтсе де, мифтің мазмұнын, сонымен қатар кейіпкерлердің мінез-құлқын сәл-пәл өзгертемін. Мен үшін, ең бастысы – спектакль мазмұнын бишілердің қимылымен жеткізе білу. Яғни, костюм, декорация, өзге де сахналық безендіруді мейлінше аз қолдануға тырысамын. Маңыздысы – би арқылы көңіл күй ырғағын жеткізу, деді премьерадан кейін қойылым туралы ойымен бөліскен қоюшы-хореограф Кристина Полин.
Орфейдің рөлін жетекші солист Сүндет Сұлтанов пен бірінші солист Уэсли Карвальо, муза әрі Орфейдің сүйіктісін жетекші солист Айнұр Әбілғазина мен Татьяна Тен, ал кемталант жазушы Аристейдің бейнесін дарынды бишілер Ерқанат Ермағамбет пен Эльдар Сәрсембаев сомдады.
Сонымен қатар жаңа қойылымға Илья Манаенков, Назерке Аймұхаметова, Дарина Қайрашева, Байқадам Түнғатаров, Артур Эдсон, Наталья Фернандес-Менес, Аңсаған Көбентай, Анар Дүкиева, Аққали Тұрғали, Нұрзат Берікқазыұлы және Серік Аманжол сынды театр әртістері қатысты.
Маусымжабар көрікті кештің екінші бөлімінде астаналық көрермен назарына ұсынылған чех елінің аты аңызға айналған пәлсапашы-хореографы Иржи Килианның «Жолдан тайғандар» балеті симфониялық оркестрдің ұрмалы аспаптар тобының сүйемелдеуімен орындалды. Ғажайып Килиан хореографиясы мен сұңғыла Стивен Райхтың дауылпаз композициясының шығармашылық үндестігінің жемісі – сахнадағы сегіз балеринаның қалықтаған қимылынан-ақ білініп, сезіліп тұрды. Хореорафтың туындысы әуезділігімен, монохромды эстетика және орындаушылықтың әлемдік деңгейімен ерекшеленді.
– Биылғы театр маусымы гастрольдік сапарлар жағынан да, түрлі жобалар жағынан да өте мазмұнды болды. Премьералық қойылымдар, сонымен қатар репертуардағы үздік спектакльдер көрермен назарына ұсынылды. «Орфей мен Эвридика» балетінің премьерасы да ойдағыдай өтті. Көрермен зор ықыласын, қошеметін білдірді. Театр сүйер қауымның арқасында біздің де тынысымыз ашылып, тың дүниелер шығаруға талпынып, шабытқа бөленіп, аса мәртебелі көрермендерімізбен қайта қауышу үшін алдағы театр маусымын асыға күтетін боламыз, деп театр директоры Александр Совостьянов маусымжабар өнер оқиғасын түйіндеді.
Мәдениет және спорт министрлігінің қолдауымен өткен театрдың жаңа туындысына тәнті болған көрермен спектакль соңынан жемісті жұмыс атқарған шығармашылық топқа зор қошеметін білдіріп, толассыз шапалағын жаудырды.
