Қалалық Төтенше жағдайлар департаментінің бастығы, полковник Руслан Қасыбаев мұндай цифрлы инновация өртті екі жағдайда: түтін және жоғары температура арқылы бірден анықтайтынын айтады. Дегенмен бұл – цифрландырудың әлемдік тәжірибесіне сүйенген қанатқақты жоба.
«Табиғи парк аумағында смарт-камера деп аталатын оптикалық сенсорлық және тепловизор қондырғыларын енгізу мәселесін пысықтап отырмыз. Температура камералары арқылы бейнебақылау жаяу және әуе патрульдеріне қарағанда тиімді әрі арзан», дейді Руслан Қасыбаев.
Айта кетерлігі, мұндай камералар тұтану көздерін автоматты түрде анықтауға, олардың пайда болу орындарын анықтауға, қажетті техника мен күшті жеткізуде ыңғайлы маршруттарды құруға қабілетті. Осылайша, Алматы құтқарушыларына «Қазавиаорманқорғау» өртті жедел сөндіру-
ге септесіп отыр. Аптап ыстық кезде күн сайын таулы-орманды аймақтың үстінен ұшып отырады. Патрульдеу кезінде дауысты сөйлейтін құрылғысы мен тепловизоры бар дрон қолданылады.
«Дрон өрт шыққан жерлерді анықтауға және оған ТЖД мобильді топтарын жіберуге мүмкіндік береді. Осындай сын-қатерлердің бәрі жоғары қауіптілік дәрежесіне ие», дейді полковник.
Қазіргі таңда ТЖД-да өрт сөндіру мен апаттық-құтқару жұмыстарын жүргізуде жедел әрекет ететін біріктірілген отряд құрылған, құтқару қызметінің авиабөлімшелері жауынгерлік әзірлікте тұр. Дегенмен қорғауға алынған аймақтарда тәртіп бұзушыларға 306 мың теңгеден астам айыппұл салынуы әбден мүмкін.
«Ерекше қорғалатын табиғи аймақтардың аумақтары мен белгіленбеген жерде от жаққаны үшін Орман шаруашылығы мекемелерінің қызметкерлері «Әкімшілік құқық бұзушылық туралы» кодекстің 367-бабы бойынша әкімшілік айыппұл салуға хақылы. Жеке тұлғаларға салынатын айыппұл сомасы 10-нан 100 айлық есептік көрсеткішке дейін, ал бұл – 30 630 теңгеден бастап 306 300 теңгеге дейінгі сома», дейді Р.Қасымбаев.
Қазіргі уақытта ТЖД, ІІБ және Іле-Алатау МҰТП қызметкерлерінен патруль қызметкерлерімен 95-тен астам рейд жүргізіліп, 45 өрттің алдын алған. Осыған сәйкес ереже бұзған 45 адам жауапкершілікке тартылды. Құзырлы мекеме бірінші кезекте өрт шығуы мүмкін қоқыстарды шығару қажеттігін қаперге салады. Белгіленген жерден тыс орында сіріңке, темекі қалдығын лақтыруға, құрғақ шөптерді жағуға, от жағуға және барбекю құралдарын пайдалануға болмайды.
Сондықтан тауда демалатындарға Іле-Алатау ұлттық саябағында ыстық тамақ пісіру үшін арнайы жабдықталған 14 орын (орындық, үстел, от жағуға арналған бетондалған алаң, барбекю), Алма-Арасан шатқалының аумағында 12 орын, Үлкен Алматы, Казачка өзендері мен Бутаковкада да орындар бөлінген.
Өрт қауіпсіздігіне қатысты тағы бір тоқтала кететін жайт, таулы Алматыда өрттің алдын алу мақсатында құрғақ шөп өскен 200 гектардай аумақ жыртылды. Бұл жұмысқа аудан әкімдіктері тартылып, осының арқасында құрғақ шөп 52 пайызға азайған.
«Өрт аумағы 80 пайызға азайып, биыл 2,8 гектарды құраса, өткен жылы өртке оранған ағаштың жалпы көлемі 13,5 гектарға жетті. Өрттің шығуына көп жағдайда отқа абайсыз болу мен шабылмаған құрғақ өсімдіктер себеп болды», дейді Алматы қалалық ТЖД бастығы.
Алматы қалалық ТЖД бастығы биыл құрғақ шөптің өртенуі салдарынан жалынның тұрғын үйлерге жайылғанын да мысалға келтірді.
АЛМАТЫ
