Қазақстандық жоғары оқу орындарында экология және қоршаған орта саласындағы білім беру бағдарламасының мазмұнын жетілдіруге арналған жобада педагогикалық шеберлікті арттыру, экология және қоршаған орта саласындағы сараптамалық білімді дамыту қарастырылып отыр. Оған жергілікті оқу орны мамандарымен қатар Қазақ ұлттық аграрлық зерттеу университеті, І.Жансүгіров атындағы Жетісу университеті, Қ.А.Ясауи атындағы халықаралық қазақ-түрік университеті, С.Сейфуллин атындағы Қазақ агротехникалық университеті, М.Х.Дулати атындағы Тараз университеті және Қ.Жұбанов атындағы Ақтөбе өңірлік университеті, А.Бараев атындағы астық шаруашылығы ғылыми-өндірістік орталығының жас ғалымдары қатысты.
Қоршаған ортаның ахуалын білу үшін жасалған жұмыстар барысында әр 25 метр сайын өсімдіктің түрлеріне зерттеу жасалып, сол аумақтағы көлемі анықталды. Жас ғалымдарға АҚШ-тағы іргелі оқу орындары профессорлары, Қазақ ұлттық аграрлық зерттеу университетіндегі тұрақты егіншілік орталығы мамандары офлайн және онлайн форматта дәріс оқыды.
– Бұл – негізінен аймақтық университеттерге арналған жоба. Қазіргі уақытта НАСА-мен бірлесіп ғылыми жоба дайындап, Арал теңізі тартылуының әлемдік климатқа әсерін зерттеу үстіндемін. Сондай-ақ семинар барысында қазақстандық және америкалық білім беру бағдарламаларын салыстырып талдау жасадық, – дейді профессор Джихуан Чен.
Америкалық маманның айтуынша, жас зерттеушілердің НАСА ғарыштық агенттігінің Қазақстандағы және Орталық Азиядағы жобаларына қатысуға мүмкіндіктері бар.
Қожа Ахмет Ясауи атындағы халықаралық қазақ-түрік университетінің оқытушысы Абылайхан Әзімбай – воркшоп барысында мазмұнды ақпаратпен, жаңа құрылғылармен танысқан жас маманның бірі. Ол үшін ғаламдық өзгерістер мен жерді бақылау орталығының профессоры Фен Пейлейдің жетекшілігімен далалық жұмыстар аясында өсімдік құрамы мен сапасы жайлы жүргізілген зерттеулер, жаңа құрылғылар арқылы ауаның ылғалдылығын, судың мөлшерін анықтау қатты қызықтырыпты. Ол профессор Джихуан Ченнің «Биофизикалық модельдер және оларды экожүйелік талдауда қолдану» атты оқу құралының осы сала мамандарына берері мол екенін айтады.
М.Х.Дулати атындағы Тараз университеті «Экология» кафедрасының меңгерушісі, PhD докторы Эльмира Мадалиева шетелдік оқытушылар білім берудің жаңа тәсілдерін үйреткенін жеткізді.
Қызылорда
