Әлеуметтік маңызы бар нысан жалпы сомасы 207 млн теңге тұратын медициналық оңалту жабдықтарының 90-нан аса түрімен жарақталған. Арнайы медициналық қызметкерлер Нұр-Сұлтан, Мәскеу және Санкт-Петербургте оқыту курстарынан өткен.
«Мемлекет басшысы Қасым-Жомарт Тоқаев 2022 жылды Балалар жылы деп жариялағаны белгілі. Абай облысында перинаталды орталықтың жанынан балалар оңалту орталығы мен ерте араласу орталығының ашылуы маңызды оқиға саналады. Ана мен баланы қорғау қызметінің дамуы қоғамның әлеуметтік әл-ауқатының индикаторларының бірі екені сөзсіз. Тұтастай алғанда, ана мен баланы қорғау – отбасын нығайтуға, ананың дәрежесін көтермелеуге, балаларды тәрбиелеуге, сондай-ақ олардың дене бітімі, зияткерлік және адамгершілік жағынан дамуы үшін неғұрлым қолайлы жағдайлар жасауға бағытталған мемлекеттік және қоғамдық іс-шаралар жүйесі», деді Семей қаласының әкімі Бақытжан Байахметов.
Аталған орталықтың неонаталды және педиатриялық қызметінің басшысы Гүлжазира Дүйсекенова орталықта атқарылған жұмыстың нәтижелерін айтты. Мәселен, жарты жылда балалардың 72%-ы аяққа тұрып жүре бастаса, 55%-ы басын тік ұстап, тағы 48%-ы еңбектеп қозғалуға үйренген. Бұл – балалардың қысқа мерзімде алған дағдылары.
Мұнда нейро-ортопедиялық аурулары бар, оның ішінде церебралды сал ауруы бар балаларды оңалтудың әлемнің үздік әдістемелері мен заманауи тәсілдері қолданылады. Мамандар аурудың ерекшеліктерін ескеріп, әр баланы қалпына келтірудің жеке бағдарламасын жасайды. Оңалту үшін қозғалыс дағдыларын дамытудың заманауи технологиялары, атап айтқанда арнайы техникалық құралдар, тренажерлер, аппараттар мен аппараттық-бағдарламалық кешендер пайдаланылады.
Церебралды сал ауруы мен тірек-қимыл мүшелерін емдеу үшін омыртқаның, буындардың жүру мен қозғалу дағдыларын қалпына келтіруге арнайы костюмдер, тренажерлер және әлемдік үздік өндірушілердің құрылғылары қарастырылған. Сонымен қатар емдік дене шынықтыру, электроэнцефалография, физиотерапия, жарықпен емдеу, су массажы, логопед және дефектологпен күнделікті жеке сабақтар өткізіледі. Иммерсиялық ванна, механотерапия, эрготерапевт және психолог кабинеттері, сенсорлық бөлме, құрғақ ванна жұмыс істейді.
Ерте араласу орталығының негізгі қызметіне дамудың ерте кезеңдерінде (3 айдан 3 жасқа дейін) балаларға кешенді оңалту көмегін көрсету жатады. Неге десеңіз, 3 жасқа дейін баланың миы икемді және оңалту еміне қолайлы болып келеді. Оны неғұрлым ерте бастаса, мүгедектіктің ауырлығын соғұрлым азайтып, баланың аурудан сауығып кетуге мүмкіндігі жоғарылайды. Орталық мамандарының маңызды міндетіне ата-аналармен жұмыс жүргізу, оларды қарапайым күнделікті іс-әрекеттер мен қозғалыстарға дағдыландыру, оның ішінде баланы дұрыс көтеруге, тамақтандыруға, сол секілді киіндіріп, отырғызуға үйрету кіреді. Өйткені оңалту ісінде ұсақ-түйек нәрсе болмайды. Бұл әсіресе ерте кезеңдерде аса маңызды.
Барлық көмек (оңалту, педагогикалық, әлеуметтік, психологиялық) тегін көрсетіледі. Екі орталықтағы жатын орын саны – 100, оның ішінде 30-ы тәулік бойы қызметке шақталған.
Жыл сайын оңалту шараларын 1 200-ден аса бала ала алады. Қазір орталықта 80 қызметкер жұмыс істейді.
«Балаларымызға әлеуметтеніп, өзін өзі күту дағдыларын алуға мүмкіндік бергендеріңізге рахмет. Менің ұлым секілді балаларға тіпті бір қадамды жасаудың өзі Эверестке шыққанмен тең. Осы орталықтағы мамандарға одан әрі өркендеп, балаларды емдеу жолындағы қызметтеріне табандылық пен төзімділік, ал ата-аналарға шыдамдылық тілеймін», деді ата-аналардың бірі.
Іс-шара оңалтудан өткен балалардың, олардың ата-аналары мен орталық қызметкерлерінің қатысуымен өткен концерттік бағдарламамен аяқталды.
Абай облысы
