Ауқымды істер арнасы

Премьер-Министр Кәрім Мәсімовтің төрағалығымен өткен кешегі Үкімет отырысында Елбасының тапсырмасына сәйкес жекешелендірудің екінші толқынын жүзеге асыру және ел экономикасына инвестициялар тарту, бизнеске қолдау көрсетудің бірінші кезекті шараларын іске қосу секілді маңызды мәселелер қаралды. Қаралған мәселелердің мәнісін бұқаралық ақпарат құралдары арқылы халыққа жеткізу үшін Орталық коммуникациялар қызметіне бұл жолы Премьер-Министрдің орынбасары – Индустрия және жаңа технология­лар министрі Әсет Исекешев, Экономика және бюджеттік жоспарлау министрі Ерболат Досаев, Өңірлік даму министрі Болат Жәмішев және «Самұрық-Қазына» ұлттық әл-ауқат қоры» АҚ басқарма мүшесі – басқарушы директор Нұрлан Рахметов келді. Әуелгі сөз кезегін алған Ә.Исе­­ке­шев ел экономикасына инвес­тициялар тарту мәселесіне тоқта­лып өтті. Оның айтуынша, елімізде қолға алынып, қазір белсенді сипатқа ие болып отыр­ған индустрияландыру бағдар­ламасын толық мәнінде жүзеге асыру үшін аталған мәселе­нің маңызы өте үлкен. Дегенмен, соңғы уақыттары бүкіл әлем бойынша алғанда инвестициялық белсенділіктің төмендеп кеткен­дігі анық байқалып отыр. Оған әлемнің ірі өңірлерінде дағ­да­рысты жағдайлардың орын алғандығы себеп болуда. БҰҰ дерек­тері бойынша, тікелей шетелдік инвести­ция тарту жөні­нен Қазақстан 2012 жылы алғашқы 20 елдің қатарына кірге­німен бұл мәселедегі іркіліс біздің елімізде де сезілуде. Осыған бай­ла­нысты Мемлекет басшысы ел эконо­микасына инвестиция тартуға ерекше мән берді. Осыған қолайлы жағ­­дай­лар туғызуды Үкіметке міндет­теді. Үкімет инвестиция тартудың кешенді жоспарының жобасын әзір­леп, осы отырыста қараған екен. Ә.Исе­кешевтің айтуын­ша, отандық экономикаға шетел­дік инвестицияларды тарту жөніндегі жұмыстар атал­ған жоспарға сәйкес екі бағытта жалғасатын болады. «Соның біріншісі – ел ішіндегі инвести­циялық ахуалды одан әрі жақсар­ту. Бұл бағыт бойынша бірқа­тар ынталандыру шаралары қолданылмақ. Екінші бағыт – ірі инвесторларды, соның ішінде трансұлттық компанияларды тарту. Бұл мақсатта біз негізгі елдер мен салаларды айқындап алдық. Қажетті шаралардың бәрі белгі­ленді. Бұл жоспар жақында ғана Президент Әкімшілігіне жолданды. Ол қабылданғаннан кейін бірден жұмысқа кірісеміз. Бұл реттегі біздің басты мақсатымыз – Қазақстанды өңірдегі ең мықты хабқа айналдыру», деді Ә.Исекешев. Экономика және бюджеттік жос­парлау министрі Ерболат Досаев өз сөзінде аталған мәселені одан әрі нақтылай түсті. Соның ішінде инвес­торларды ынталандыру үшін шаралар топтамасы әзірленгендігін айтып өтті. Бұл шараларда біздің экономикамызға қаржы салған инвесторларға олардың шығынының бір бөлігін жабу үшін көмек көрсетілетіндігін атап көрсетті. Ол көмектер қуат тасымалдаушыларға және өнімді жеткізу бойынша тасымалдауға кеткен шығындардың бір бөлігін қаржыландыру үшін көрсетілмек. Сонымен қоса, шетелдік жұ­мыс күшін тартқысы келетін инвес­тор­ларға квотадан тыс және рұқсат алмай-ақ инвестициялық жобаны жүзеге асырудың бүкіл кезеңінде және нысанды іске қосқан соң, бір жыл көлемінде шетелдік жұмыс күшін тарту құқықтары берілмек. Мұның сыртында инвесторлар 10 жыл мерзімге дейін қосымша құн салығын төлеуден босатылады, оларға нысанды іске қосқаннан кейін жұмсаған күрделі қаржы шығын­дарының бір бөлігін өтеу бойынша мемлекет тарапынан инвестициялық субсидия берілетін болады. Сондай-ақ, Е. Досаев жекеше­лен­ді­рудің екінші толқынын жүзеге асыру шараларына да тоқталып өтті. Оның айтуынша, Үкімет отыры­сында 2014-2016 жылдарға арнал­ған жекешелендірудің кешенді жос­пары шеңберінде бәсекелестік ортаға тапсырылатын кәсіпорындар мен нысандардың тізбесі анық­тал­ған. Жекеменшікке тапсырыла­тын мұндай ұйымдардың ішінде ком­мер­циялық сипаттағы ғылыми мекемелер, шипажайлар, бұқаралық ақпарат құралдары, күзет мекемелері бар. Осындай ұйымдарды жекешелендіру нәти­­жесінде республикалық меншік­тегі нысандар саны 28 пайызға қыс­қаратын болады. «Тұтастай алғанда республика бойынша бәсекелестік ортаға 782 квазимемлекеттік сектор ұйымдары беріледі. Оларды жекеменшікке тапсыру рет-ретімен жүйелі түрде жүзеге асырылады. Мәселен, 2014 жылы 101 ұйым, 2015 жылы – 50, 2016 жылы 26 ұйым жеке секторға шығарылады. Мұның сыртында 380 ұйымға қайта құру жұмыстары жүргізіледі. Олардың кейбіреуінің жойылуы да мүмкін», деп атап көрсетті Е. Досаев. «Самұрық-Қазына» өкілі Нұр­лан Рахметов осы қор бойынша жеке­шелендірілетін ұйымдар жайы­на тоқталып өтті. Оның айтуынша, аталған қордан 223 ұйым жеке сек­торға тапсырылып, мұндағы кәсіп­орындар саны 37 пайызға дейін қыс­қаратын болады. Өңірлік даму министрі Б.Жәмішев бизнеске қолдау көрсе­тудің бірінші кезекті шараларын жүзеге асыру жос­пары Үкімет отырысында мақұл­дан­ғандығын айтып өтті. Оның айтуынша, Мемлекет бас­шысы Н.Назарбаевтың бұл мәселе жөніндегі Үкіметке берген басты тапсырмасы бизнеске қол­дау көрсе­туді Экономикалық ынты­мақ­тастық және даму ұйымы секілді әлемдегі ең дамыған елдердің басын қосып отырған интеграциялық бірлес­тіктің қағидаттарына сәй­кес жүзеге асыру болатын. Бұл қағи­даттар 2010 жылы 15 маусымда қабылданған Бо­лон хартиясында айқындалған. Соған сәйкес елімізде бизнеске қол­дау көрсетудің бірінші кезекті шараларын жүзеге асыру жоспары 6 бағыт бойынша жасалыныпты. Ол бағыттар тұрақты іскерлік орта құру, шағын және орта бизнесті дамы­тудың тиімді шараларын басқа салаларда қолға алынған саясатпен үйлестіру, білім беру мен адам факторын дамыту, жеке және мемлекеттік секторлардың әлеуметтік әріптестігін нығайту, қаржы ресурстарына тиімді қолжетімділікті қамтамасыз ету және жаңа технологиялардың дамуына қажетті орта қалыптастыру секілді маңызды міндеттердің басын қосады. Баспасөз мәслихатында жур­на­лис­тер тарапынан бірқатар сұрақтар қойылып, олардың барлығына тыңғы­лықты жауап қайтарылды. Сұңғат ӘЛІПБАЙ, «Егемен Қазақстан».