Маңғыстауда жүк пойызы мен жеңіл автокөлік соқтығысты

АҚТАУ. 30 сәуір. Маңғыстау облысында жүк пойызы мен автокөлік темір жолдың үстінде соқтысығыс қалды. Бұл туралы облыстық ішкі істер департаменті баспасөз қызметінің дерегіне сүйенген egemen.kz тілшісі хабарлады. Оқиға кеше түнде Ақтау қаласынан оншақты шақырым жерде орын алған. «ВАЗ-21099» автокөлігі 16 тіркемесі бар жүк пойызымен соқтығысқан. Нәтижесінде автокөліктің 31 жастағы жүргізушісі оқиға орнында қайтыс болды. Ал онымен көлікте бірге болған жолаушы – 30 жастағы жігіт облыстық ауруханаға жеткізілді. Ақпарат көздері опат болған жүргізуші жігіт облыстық мамандандырылған күзет қызметі басқармасы қызметкері екенін айтады. Аға сержант шеніндегі полицей Қызылорда өңірінде туған, соңғы жылдары Маңғыстау облысының Мұнайлы ауданында тұрған. 2006 жылдан бері құқық қорғау саласында қызмет еткен. Оның артында үш сәбиі қалып отыр. Қазір Маңғыстау облыстық ішкі істер департаментінің қызметкерлері жол-көлік оқиғасының орын алу себебі мен кінәлілерді анықтау үшін тергеу амалдарын жүргізуде. Сот-медициналық сараптама  жасалуда. Гүлайым Шынтемірқызы. Дереккөз: egemen.kz. Фото: lada.kz.