![Кәсіп бастаған келіншектер «Еңбек» бағдарламасына дән риза](/media/2022/07/18/kasip.jpg)
Коллажды жасаған Зәуреш СМАҒҰЛ, «EQ»
Ал осы «Еңбек» бағдарламасы аясында өз кәсібін ашқан абзал жандардың қатары Еңбекшіқазақ ауданында көбейіп келеді екен. Мысалға, Сарыбұлақ ауылының тұрғыны, көпбалалы ана Ажархан Тапай өзінің жеке кәсібін ашу үшін 200 айлық есептік көрсеткіш көлемінде грант ұтып алды. Көпбалалы ана өткен жылдың қыркүйек айында халықты жұмыспен қамту орталығына барып, «Еңбек» бағдарламасының екінші бағыты бойынша грант алу жолдарын қарастырып, жаңа идеясын жүзеге асыру мақсатында конкурсқа қатысқан. Нәтижесінде, жобасын ойдағыдай қорғап шығып, 583 мың теңге көлемінде грант иегері атанды.
– Маған грантты қалай алу, конкурсқа қалай түсу керек екені жайлы халыққа қызмет көрсету орталығының қызметкерлері жақсылап түсіндіріп берді. Өзім – атамекенге оралған қандаспын. Біз Қытайда тұрған кезде ағаш өңдеумен айналыстық. Сол уақытта домбыра, астау жасайтынбыз. Сондықтан отбасымызбен келісіп, ағаш шеберханасын ашуға бел будық, – дейді көпбалалы ана Ажархан Тапай.
Жалпы, Ажархан Қытайдан елге көшіп келген соң отбасын асырау үшін түрлі салада жұмыс істеген. Ал кәсіп бастауды үйренгеннен кейін бағдарлама бойынша ұтып алған қаражатына ағаш өңдейтін станоктар мен қажет құрал-жабдықтарды сатып алды.
Сондай-ақ Есік қаласында тұратын көпбалалы ана Рәзина Асқанбай да «Еңбек» бағдарламасының игілігін көріп отыр екен. Рәзина да – Қытайдан оралған қандасымыз. Ол көрші елді косметологияның қыр-сырын оқып, меңгерген болатын. Ал елге келгесін өз ісін бастауды армандап жүрді. Бастапқыда қаржы тапшылығы қолбайлау болғанымен, өз ізденісінің арқасында мемлекеттік бағдарлама арқылы бастапқы қаражат алуға болатынын білген. Құжатты әзірлеп, бизнес жобасын жасаған Рәзинаға «Еңбек» бағдарламасы арқылы қолдау қаржы бұйырған. 200 айлық есептік көрсеткіш мөлшеріндегі ақша қолға тиген соң бірден космотолгия кабинетін жасақтапты. Қазір Есік қаласындағы адам аяғы үзілмейтін сұлулық салонының бірі – осы Рәзияның иелігінде.
Жалпы, аймақта қыз-келіншектер кәсібінің дамуы жолға қойылғаны анық. Бұл бағытта облыстық кәсіпкерлер палатасы жанындағы әйелдер кәсіпкерлігін дамыту орталығының бастамасы баянды деуге толық негіз бар. Өңірде әйелдерді тігін ісі мен кондитерлік өнім өндірісі бойынша оқыту жолға қойылды. Деректерге назар салсақ, қазір тігін ісі бойынша 25 әйел және кондитерлік өндіріс бойынша 26 әйел жаңа мамандық меңгеруге кіріскен. Арнайы курстарда кәсіпкерлер, көпбалалы аналар, халықтың әлеуметтік осал топтарынан шыққан әйелдер білім алуда.
– Облысымызда әйелдер кәсіпкерлігі белсенді дамып келеді. Былтыр дамыту орталығы ашылды, онда кеңестер мен жобаларды сүйемелдеу түрінде қолдау көрсетіледі. Оқыту әйелдер кәсіпкерлігін дамыту орталығына өтініш білдіргендердің ұсыныстары ескеріле отырып ұйымдастырылуда. Тегін курсты тәмамдаған соң олар маман ретінде өз кәсібін ашуға немесе жұмысқа орналасуға мүмкіндік алады, – дейді Алматы облыстық кәсіпкерлер палатасының бөлім басшысы Сәния Наурызбаева.
Алматы облысы