Жақында Ақтоғай ауданында екінші шағын индустриялық аймақ өз жұмысын бастады. Былтыр Әуелбек ауылында тұрғындардың жеке ісін дөңгелетуіне мүмкіндік берілген еді. Қожамжар ауылында да осы іспетті орталық ашылып, кәсіп бастауға ниетті азаматтарға қолайлы жағдай жасалды.
Қожамжар ауылының тұрғыны Шынар Түсіпбекованың мамандығы – тігінші. Бұған дейін тұрғындардан тапсырыстарды қабылдап, тұрмыстық қажеттіліктерді тігетін арнайы орын болмағандықтан, бұл іспен үйінде айналысқан. Ауылдастары мен жақын елді мекендердегі тұрғындарға көрпе, жастық, қоржын тігіп, күнделікті нәпақасын тауып отырыпты. Әйтсе де, үйде тігін тігу ыңғайсыздық тудыратыны белгілі. Ендігі жерде ол ауылдық әкімдік ғимаратының сол қанатында ашылған шағын индустриялық аймақта жұмысын жалғастыратын болды.
– Тұрғындар тарапынан тігіншілердің өніміне сұраныс жоғары. Әсіресе жазғы уақытта сырға салу, құдалық, мерейтой сынды тойларға қажет дүниелерге тапсырыс жиі түсіп жатады. Одан бөлек, көйлек, жейде тігу сияқты жеке тапсырыстар болады. Бұған дейін оның барлығын үйдегі қауырт тірліктің ортасында отырып дайындау сәл қолайсыздық тудырса, енді жарық әрі кең бөлмеде жұмыс істеуге жағдай қарастырылды. Ауылымыз өркендеп, шағын да болсын жеке ісін дөңгелетіп отырған тұрғындарға осындай мүмкіндіктің беріліп отырғанына қуаныштымыз, – дейді ол.
Қожамжардағы шағын индустриялық аймақта тігін салонымен қатар, фото-видео студиясы, шаштараз бен сұлулық салоны бар. Бұл ғимаратты жөндеуге аудандық бюджеттен шамамен 4 млн теңге жұмсалған. Жергілікті биліктің қаржылай қолдауы нәтижесінде қазіргі таңда төрт тұрғын ауылдастарына жайлы жерде сапалы қызмет көрсете алады. Алдағы уақытта шағын индустриялық аймақтан орын алған кәсіпкерлер бизнесін одан әрі дамыту үшін мемлекеттік бағдарламаларға қатысуға ниетті.
Павлодар облысы
Ақтоғай ауданы
