Спорт • 19 Шілде, 2022

Рыбакина үздіктер тізімінде

79 рет
көрсетілді
2 мин
оқу үшін

Таяуда Relevant | Tennis Stats & Info порталында 2022 жылдың басынан бері ең көп табыс тапқан теннисшілердің рейтингі жарияланды. Солардың қата­рында қазақстандық Елена Рыбакина да бар.

Рыбакина үздіктер тізімінде

Таяуда ғана Лондонда өткен «Уимблдон» турнирінде айды аспанға шығарып, бас жүлдені олжалаған 23 жастағы жерлесіміз әлемдік рейтингте жоғарыламаса да, материалдық тұрғыдан біраз олжаға кенелді. Одан бөлек, ол тағы бірқатар дүбірлі додада бақ сынады. Кейде сәтті өнер көрсетсе, кейде жеңілістің кермек дәмін татты дегендей. Жыл басынан бері Елена Рыбакина 3,3 миллион АҚШ доллары көлемінде табыс тапты. Бұл – жоғарыда аталған рейтингтегі жетінші нәтиже.

Ал үлде мен бүлдеге оранған­дар­дың тізімін Ига Свентек бастап тұр. 21 жастағы Польшаның аса дарын­ды ойыншысы биыл «Ролан Гаррос­та» топ жарып, Аустралияның ашық біріншілігінің жартылай финалына дейін жетті. Сонымен қатар Доха, Индиан-Уэллс, Майами және Штутгарттағы жарыстарда бас жүл­дені олжалады. Осындай жарқын жеңістерінің арқасында Свентек осы жылдың өзінде-ақ 6,6 мил­лион долларға байыды. Қазіргі кезде поляк қызы әлемдік рейтингте көш бастап тұр. 

Екінші орында – Рафаэль Надаль. 36 жастағы Испанияның даңқты теннисшісінің бағындырмаған белесі жоқ. Қазіргі кезде АТР рейтингінде төртінші орынға тұрақтаған На­даль биыл «Үлкен дулыға» сана­тындағы екі бірдей турнирдің жеңім­пазы атанды. Алғашында ол Аус­тралияның ашық біріншілігінде алдына жан салмаса, көп кешікпей Ролан Гарроста дара шықты. Үшінші сатыға Карлос Алькарас жайғасты. Ол да Испанияның тумасы. Осыдан екі жыл бұрын ғана қалың топтың арасында жүрген 19 жастағы сайып­қыран былтырғы маусымды 32-орынмен қорытындыласа, қазіргі кез­де үздіктер тізімінде  алтыншы са­тыға тұрақтады. Алькарастың табысы – 4,3 миллион.

Сондай-ақ биыл мол олжаға кенелгендер қатарында Но­вак Джокович (4,2 млн), Стефанос Цици­пас  (3,6 млн), Онс Жабер (3,4 млн), Каспер Рууд (2,9 млн), Тейлор Фриц (2,6 млн), Александр Зверев (2,6 млн), Даниил Медведев (2,5 млн), Эшли Барти (2,3 млн), Хуберт Хуркач (2,1 млн), Феликс Оже-Альяссим (2,1 млн), Андрей Рублев (2 млн) және Янник Синнер ( 2 млн) сынды саңлақтар бар.