Мысалы, «Алтын шаңырақ ұясы» тігін орталығында қазіргі уақытта 13 көпбалалы ана жұмыс істейді. Орталық заттардан бастап үй тоқымасына дейін тігу, реставрациялау, конструкциялар, бұйымдардың барлық түрін ұсынады. Карантин кезінде медицина қызметкерлеріне маскалар мен костюмдер тігілді. Орталық директоры Әлида Отарбаева 2021 жылы «Бизнестің жол картасы-2025» бизнесті қолдау мен дамытудың мемлекеттік бағдарламасы аясында грант алды. Ұтып алынған грантқа орталыққа қажетті құрал-жабдықтар сатып алынды.
«Былтыр белгілі қолөнер шебері Ырза Тұрсынзаданың шеберлік сабақтарына қатыстық. Біздің ұстазымыз сол кісі. Одан кейін «Алтын шаңырақ ұясы» атты қоғамдық бірлестікті құрдық. Қала әкімдігінен көмек сұраған едік, өтінішіміз кері қайтарылған жоқ. Қазір мұнда 13 көпбалалы ана жұмыс істейді. Негізгі кәсібіміз – төсек жабдықтары, көрпе-жастық сияқты қыз жасауын тігу. Әртүрлі ұлттық киімдерді де тігеміз. Шикізатты орталық базардан сатып аламыз. Тапсырыстар көп түсіп жатыр», дейді тоғыз баланың анасы Әлида Отарбаева.
Елордада былтыр әлеуметтік осал топтармен жұмыс істейтін сегіз орталық ашылған. Мұндай орындар әуелі көпбалалы аналар мен ерекше қажеттіліктегі жеткіншектерді тәрбиелеп отырған отбасылар үшін қажет. Жанар Баймұхамбетова – алтын құрсақты ана. 9 баланы дүниеге әкелген ол қазір осы орталықтағы тігін цехында еңбек етеді.
«Тапқан табысым бала-шағамды асырауға жеткілікті», дейді көпбалалы әйел. Бұрындары жұмыссыз жүрген Жаннаны өзі секілді аналар осында шақырған. Қазір «екі қолға бір күрек» ұстаған ол қыз жасауы мен түрлі бұйымдар тігуді қолға алған.
«Ешқандай жұмыстан қашпаймыз. Қандай жұмыс болса, соны істеуге тырысамыз. Бұл жердің бізге берері өте көп. Неге десеңіз, бұл жер алтын құрсақты аналарымыз бас қосатын жер. Содан кейін біз бір-бірімізге көмектесе аламыз. Сөзбен болса да, іспен болса да. Қолымыздан келетін қазақ қол өнерін жоғалтпау керек. Екіншіден, Қазақстанда отандық өнімді дамытуымыз қажет», деді Ж.Баймұхамбетова.
Осындай елдің болашағына еңбек етіп келе жатқан орталықтардың бірі – Bilim All. Орталық Strong Mothers қоры жанынан ашылған. Бұл жерде көпбалалы аналар мен мұғалімдер еңбек шарты бойынша халықты жұмыспен қамту орталығы арқылы еңбек етеді. Жоба жетекшісі Райгүл Серікбаева 2021 жылы «Бизнестің жол картасы-2025» бизнесті қолдау мен дамытудың мемлекеттік бағдарламасы аясында грант алды. Осы қаражат орталықты дамытуға және орталық үшін техника мен жабдықтар сатып алуға бағытталды.
«Көпбалалы, жалғызбасты, ерекше бала өсіріп отырған аналар бірігіп Strong Mothers NS («Нұр-Сұлтанның мықты аналары») атты қоғамдық қор аштық. Біздің қоғамдық қордың басты мақсаты – халықтың әлеуметтік осал топтағы балалардың, мүмкіндігі шектеулі балалардың әлеуетін ашу, көпбалалы аналар мен ерекше балаларды тәрбиелеп отырған әйелдерді қолдау арқылы Қазақстанның дамуына жәрдемдесу. Осы қоғамдық қор арқылы аз қамтылған отбасыларға, көпбалалы, жалғызбасты, ерекше бала өсіріп отырған аналарға ақпараттық, құжаттық көмек беру, демеушілер мен серіктестер көмегімен азық-түлік себетін таратып беру, осы топтағы отбасылардың балаларын 50 пайыз жеңілдікпен өз мекемемізде оқыту. Әлі де біздің атқарар шаруамыз көп. Бәріміз бірлесе, біріге отырып балаларымызды кемел келешекке жетелейік», деді орталық директоры Р.Серікбаева.
Strong Mothers Ns қоғамдық қорының басшысы әрі әлеуметтік кәсіпкер Райгүл Серікбаеваның айтуынша, орталықтар желісін ашуға көпбалалы ана болғаны әрі өзінің тәжірибесі әсер еткен.
«Мен ағылшын тілінің ұстазымын және серіктестерім де мұғалім, сондықтан біз бірге Bilim All жобасын ашуды ұйғардық. Мен, ана ретінде, балаларымды оқытуда қиындықтарға тап болдым: бәрі қымбат және алыс. Көпбалалы отбасылардан шыққан балалардың қолжетімді қосымша білім алуына мүмкіндігі жоқ. Мұндай балаларға көмектесу менің арманым болды. Халықтың әлеуметтік осал топтарына көпбалалы отбасылардан шыққан балалар, мүгедектігі бар және толық емес отбасылардан шыққан балалар жатады. Мақсатым – соларға қолұшын созу», деді қоғамдық қор басшысы.
