Білім ордасы басшысының бұл әрекеті ата-аналардың ашуын туғызған. Бір айдан соң жаңа оқу жылы басталады. Мектепішілік іс-шараларда күн төбеден төнгенде оқушылар осы қиылған ағаштарды саялайды екен. Әрі білім шаңырағының көркіндей көзге ыстық көрінеді. Енді оқушылар мектеп ауласын таздың басындай тықырлап тастағандықтан үзілісте көлеңке іздеп сенделмек. Бұл – «атаңнан мал қалғанша тал қалсын» деп түйсінген қазақтың дүниетанымына жат әрекет. Мұны бізге жиналған бір топ тұрғын айтты.
«Мектеп маңындағы ағаштар заңсыз кесілді. Бұл дұрыс емес. Нақты бір шешім шықса үндемес едік. Мектеп басшыларының қарағайлардың балаларға қауіп төндіріп тұрғанын, болашақта мұнда шырша ағашы егілетінін айтып жатыр. Егер тамырын алып қарасақ, қарағайдікі жайылып, шыршанікі тік өседі. Яғни шырша ағашы одан да қауіпті», дейді қала тұрғыны Екатерина Тусупбаева.
Шаһар тұрғындарының бірқатары «қауіпсіздікті ойласа, мектепке қарама-қарсы орналасқан жатақхана ауласындағы құлайын деп тұрған қарағайларды неге шаппаған» деп ренішін білдірді. Тіпті кейбірі мектеп басшылығының іс-әрекетін ақтап әлек. «Білім ошағы басшысының ағаштарды рұқсатсыз кескені дұрыс емес шығар, бірақ ол ең алдымен қауіпсіздікті ойлады», деп біржақты қарамауға шақырды. Ал мектеп директоры Жанар Жақыпбекова өз кінәсін мойындап отыр.
«Кінәмді мойындаймын. Мектепте мыңнан аса бала оқиды. Кішкентай 30 балдырған балабақшада жүр. 100-ден аса қызметкер бар. Оқушылар мектептің ауласында жүгіріп жүреді. Мен бұл жерде ағаштарды емес, балалардың, мектеп қызметкерлерінің қауіпсіздігін көбірек ойладым», дейді Ж.Жақыпбекова.
Жалпы, мектеп ауласынан 16 қарағай, 7 қарағаш, 1 терек кесілген. Бұл мәселе әлі қаралуда. Білім ошағы басшысының кінәлі, кінәсіз екені жайлы нақты шешім жақын арада шығады.
Жетісу облысы
