Фильмнің сюжеті әлеуметтік желіде танысқан тағдырлы жандардың махаббатына құрылған. Бірі зағип, бірі мылқау.
Денис Тен бұл сценарийді 2018 жылы Тимур Бекмамбетовтің кинокомпаниясы атынан Screenlife Contest байқауына қатысу үшін жазған еді. Өтінішін жасырын жолдап, финалистер қатарынан көрінді.
«Мен Дениске питчингке қатыс деп идея айттым. Сосын ол жасырын түрде өтініш берді. Байқауға әлемнің түкпір-түкпірінен 250-ден астам өтінім түскен. Нәтижесінде, Мәскеуде өткен халықаралық байқауда Денис жеңімпаз атанды. Біз түсірілімді Лос-Анджелестен бастауды жоспарлап қойғанбыз. Бұл қайғылы оқиғадан бір ай бұрын болған еді. Кейін Денистің анасымен бірге фильмді түсіру керек деп шештік», дейді спортшының досы, атқарушы продюсер Игорь Цай.
Түсірілім жұмыстары 2019 жылдың басында басталып, үш айға созылған. Режиссері – Венеция кинофестивалінің жеңімпазы Чак Че. Халықаралық фильмді түсіруге қазақстандық мамандар да атсалысты.
Игорь Цайдың айтуынша, фильм ел назарына 28 шілдеден бастап ұсынылмақ. Сондай-ақ күзде Оңтүстік Кореяда прокатқа шығады.
