Бүкіл еліміз бойынша Қазақстан халқының бірлігі күні тойлануда

АСТАНА. 1 мамыр. Бүгін Мемлекет басшысы Нұрсұлтан Назарбаевтың қатысуымен Астанадағы  «Қазақ Елi» монументi алдында Қазақстан халқының бірлігі күні мейрамы салтанатты жағдайда басталды. Сондай-ақ, еліміздің барлық аймақтарында да мерекелік думан өз шымылдығын ашты. Бұл туралы egemen.kz тілшісі хабарлады. Астанадағы «Қазақ елі» монументі алаңындағы концерттік бағдарламалар үш түрлі сахнада жүргізілуде. Бұл мәдени шаралар күні бойы толастамайды. Негізгі сахнада 700-ден астам жекелеген өнерпаздар мен шығармашылық ұжымдар халыққа көтеріңкі көңіл-күй сыйламақ. Сахнада «Наз» би ансамблi, «Шабыт» қазақ ұлттық өнер университетiнiң би тобы, Өскемен қаласының «Флэш» балет тобы, Қарағандының «Исторка» би ансамблi, Шымкент қаласының «Шамсинур» және «Айгөлек» би топтары, сондай-ақ ТМД елдерiнен – «Вайнах» би ансамблi (РФ Шешен Республикасы), Омбы (Ресей) мемлекеттiк би және ән ансамблi, Тбилисидің грузин ұлттық хоры, Анкараның түрiк ұлттық хоры көпшілікке өз өнерлерін ұсынады.  Бұлардың арасында басқа да мемлекеттерден келген   – Зитхер (Германия), Мадан Оак (Үндiстан), Чжу (Қытай)  сынды әншілер де бар. Ал кіші сахнада 17.00-ге дейін 23 этномәдени бірлестік өкілдері  өнер көрсетеді. Алаңда әр елдің мәдениеті мен тарихынан сыр шертетін Қазақстан халқы Ассамблеясының этномәдени қалашығы құрылған. Сонымен қатар, арнайы дайындалған спорттық алаңдарда арқан тартыс, тоғызқұмалақ, гір көтеру сынды ойындардан сайыстар ұйымдастырылады. Алдын ала хабарлағанымыздай, мерекелік бағдарлама еліміздің белгілі әншілерінің концертімен жалғасады. Жолдыбай Базар. Дереккөз: egemen.kz. Фото: «ҚазАқпарат».