Бұл құжат Қазақстанды цифрландыру мақсатында қабылданғаны белгілі. Мәжіліс депутаты, Amanat партиясының IT-комитетінің төрайымы Екатерина Смышляеваның айтуынша, заңның маңызды тармақтарының бірі ауылдық елді мекендердегі байланыс сапасын жақсарту болып отыр.
«Энергетикалық инфрақұрылымға сүйене отырып, оптикалық-талшықты байланыс желісін әуеден тарту жөніндегі партиялық бастаманы барлық мүдделі мемлекеттік органдар қолдады. Елімізде электр желісі қарқынды дамыған. Тіпті шалғай ауылдық елді мекендерде де қуат көзі бар. Байланыс желісін әуе арқылы тарту – арзан әрі жылдам. Цифрландыру туралы заң ауылдарға сапалы интернетті тезірек жеткізуге көмектеседі. Бұл ретте, жауапсыз операторларға қатысты айыппұл санкциялары қолданылады», деді депутат.
Сондай-ақ жаңа құжатта еGovMobile мобильді қосымшасын қолдану аясын кеңейту көзделген. Бұл қосымшаға енді 20-ға жуық құжат жинақталмақ. Соған сәйкес, азаматтардан құжаттардың түпнұсқасы талап етілмейді. Құжаттардың цифрлық нұсқасы қағаз нұсқамен тең деп танылды. Сонымен қатар құжатты тұрғылықты жерге қарамастан, еліміздің кез келген халыққа қызмет көрсету орталығынан алуға болады.
Цифрлық даму, инновациялар және аэроғарыш өнеркәсібі министрлігі Цифрлық трансформация департаментінің директоры Назгүл Бажаеваның айтуынша, «Қазпошта» АҚ базасында мемлекеттік қызметке қолжетімділігін кеңейтуге мүмкіндік беретін цифрлық орындар құру жоспарланған.
«Бүгінде ауыл тұрғындарына мемлекеттік қызметтерді алу үшін «Азаматтарға арналған үкімет» мемлекеттік корпорациясының бөлімшелері орналасқан аудан орталықтарына немесе қалаларға барып, уақыт пен қаражат шығындауға тура келеді. Цифрлық орындар – компьютермен және ұйымдастыру техникасымен жабдықталған, интернетке қолжетімді, азаматтарға қызметтерді өз бетінше алуға мүмкіндік беретін жұмыс орны. Осыған ұқсас цифрлық орындар Қазпоштаның 2 мың ауылдық бөлімшесінде ашылады. Бұл күндері мұндай цифрлық орындар Шығыс Қазақстан облысында қанатқақты режімде жұмыс істеп жатыр», дейді Н.Бажаева.
Сондай-ақ саладағы білікті кадрлардың тапшылығы мәселесін шешу бойынша бірқатар шара қабылданып жатыр. Мәселен, жас мамандарды тарту мақсатында бағдарламалау мектептерінде білім алуға арналған арнайы гранттар қарастырылды. Бұл жоба Astana Hub және IT-мектептермен бірлесіп іске асырылады. 2025 жылдың соңына дейін кемінде 20 мың білікті IT-маманын дайындау жоспарланып отыр.
Айта кетерлігі, заңда алғаш рет цифрлық трансформация термині қолданылды. Мұндағы мақсат – азамат пен мемлекет арасындағы арақашықтықты барынша қысқарту. Азамат мемлекет үшін клиент саналады. Цифрлық трансформацияның нақты мысалы осы. Көп адам автокөлікті қайта ресімдеу үшін Kaspi.kz қосымшасын пайдаланады. Бүгінде 2 миллионға жуық адам мамандандырылған халыққа қызмет көрсету орталықтарына бармайды. Бұл жеке сектор мен мемлекет кооперациясының бірегей үлгісі саналып отыр.
