Кедендегі көлік кептелісі электронды кезек арқылы реттеледі

Қытай Халық Республикасы басқа елдерден кіретін жүк көліктерінің санын ұлғайтуына байланысты кеден бекетінде кепте­ліс пайда болған. «Достық» бекетіне қарай қазақ­стан­дық­тар­дан бөлек, Ресей және Беларусь мем­лекеттерінен де ағылып жат­қан көлік көп.

Осы уақытқа дейін шекарадан күніне 10-15 қана жүк көлігі өтсе, қазір бұл көрсеткіш бірнеше есе­ленген. Сондықтан кеден бе­ке­тіне қосымша мамандар жұ­мылдырылды. Сәйкесінше, жұ­мыс уақыты да таңғы 8:00-ден кешкі 20:00-ге дейін ұзар­тыл­ды.

«Бұған дейін кеден бекеті таңғы 8:00-ден кешкі 17:00-ге дейін жұмыс істейтін. Жұмыс уа­қытын қосымша 3 сағатқа создық. Құжат сканерлеуші және тексеруші мамандарды көбейттік. Жалпы саны 31 адам қызмет етуде. Дүйсенбіден бастап тағы 8 адам қосылады. Қазір шекарадан күніне 100 жүк көлігі өтеді. Әр көлікті тексеру уақытын да жылдамдатып жатырмыз», дейді облыстық мемлекеттік кірістер департаментінің басшысы Талғат Қозыбеков.

Кеден бекетінде қазір 500-дей көлік тұр. Оларды мамандар алдағы 2-3 күнде тексеріп өткізбек. Ал кезек пен тәртіп мәселесін жергілікті әкімдік, полиция реттейді.

«Бізде жедел штаб құрылған. Оның құрамында кеден және шекара қызметі, полиция бө­лі­мі мен көлік прокуратурасы қызметкерлері бар. Қа­лып­тас­қан жағдайға байланыс­ты штаб оты­рысын өткіздік. Мәсе­ле­ні жан-жақты талқылап, шешу жолдарын қарастырдық. Кезекті реттеу үшін электронды жүйе қалып­тасқанға дейін есепке алу және оңтайландыру жолдары қарас­тырылды», дейді Ала­көл ауда­нының әкімі Алмас Абдинов.

Жалпы, көлік өткізу әлеуетін арттыру бағытында кеден бекетін кеңейту жұмыстары қолға алынды. Маусым айында қосымша автомобиль өткізу пунктінің құрылысы басталды. Жобаны іске асыру бір жарым жылға жос­пар­ланған. Онда тәулігіне ары-бері 1 200-дей көлік тексері­ліп өте­тін болады.

Естеріңізге сала кетсек, бұған дейін Қорғастағы «Нұр жолы» өткізу бекетінде де көлік кепте­лі­сі орын алған еді. Қазір бұл бекетте электронды кезекке қою жүйесі енгізіліп, мәселе шешімін тапты. Нәтижесінде, қазір күніне бекет арқылы еш кедергісіз 100 шақты көлік өтеді. Ең бастысы, осы әдіс арқылы саладағы барлық делдалдық және алыпсатарлық жүйелер толығымен жойылды.

Жетісу облысы