«Қазақстан фермерлері атынан сіздің 2022 жылдың 14 шілдесінде Үкіметтің кеңейтілген отырысында айтқан отандық ауыл шаруашылық техникаларына жеңілдетілген несиелеу механизмін енгізу туралы тапсырмаңызды толығымен қолдаймыз» деген ол елімізде астық жинау науқаны тамыз айының бірінші жартысында басталатынын, бірақ өткен жылдары ауыл шаруашылығы тауарын өндірушілер арасында жақсы нәтиже берген қазіргі ауыл шаруашылығы техникасын лизингке беру бағдарламаларына қаражаттың жоқтығынан бүгінде ауыл шаруашылығы техникасын жаппай жаңарту мүмкін еместігін еске салды.
Ауыл шаруашылығы министрлігінің дерегі бойынша, отандық ауыл шаруашылық техникаларының паркінде 147,7 мың трактор, 38,1 мың комбайн бар. Бұл ретте ескірген техника үлесі 80 пайызға жеткен.
«Мәселенің маңыздылығын және астық жинау науқаны жақындап келе жатқанына байланысты маңызды мерзімдерді ескере отырып, сізден көмек сұраймыз. Атап айтқанда, Индустрия және инфрақұрылымдық даму министрлігіне, Экология, геология және табиғи ресурстар министрлігіне, Ауыл шаруашылығы министрлігі мен «Бәйтерек» ҰБХ» АҚ 3 пайызға дейінгі сыйақы мөлшерлемесімен бастапқы жарнасыз «ӨКМ операторы» есебінен қаржыландыру көлемі 50 млрд теңге болатын ауыл шаруашылығы техникасын жеңілдетілген лизингке беру бағдарламасын іске қосу туралы тапсырма беруіңізді сұраймыз», дейді Ж.Дайрабаев Президентке айтқан ұсынысында.
Оның сөзіне қарағанда, аталған бағдарламаның іске қосылуы парктегі 1 мың бірлік трактор мен комбайнды жаңартып алуға, сөйтіп астық жинау науқанына абыроймен үлгеруге мүмкіндік береді.
Осыған дейін сенатор Мұхтар Жұмағазиев ауылшаруашылық техникаларын субсидиялауды қайта қарау керегін жеткізген еді. Депутаттың айтуынша, техниканың ескілігіне байланысты астық жинау науқаны дұрыс атқарылмайды, бұл өз кезегінде өндірістің қысқаруына және басқа да шығындарға жол ашып береді. Қазір кәсіпорындарды қолдау үшін отандық және шетелдік техникалар субсидияланады. Отандық өндірістен шығатын «Есіл» және «Вектор» комбайндары 40-50 млн теңге тұрса, импорттық Claas немесе John Deere комбайндары 120-150 млн теңге көлемінде.
«Соған сай, қазақстандық комбайндарға берілетін субсидия 10-12,5 млн теңгені құраса, шетелден сатып алынған техникалар үшін 30-30,5 млн теңге беріледі. Енді осы қисынға салсақ, мемлекет бір импорттық комбайнның орнына үш бірдей отандық комбайнды субсидиялай алады. Сол себепті отандық өндіріске қолдау көрсетуіміз керек. Субсидия мәселесі қайта қарауды талап етеді», деген болатын М.Жұмағазиев.
Фермерлер мен сарапшылардың айтуынша, соңғы бірер жыл көлемінде ауылшаруашылық техникалары қатты қымбаттап кеткен. Шамамен 30 пайызға өскен. Енді олардың тапшылығы да байқалуда. Біздің ел агротехникаларды негізінен ТМД елдерінен сатып алады.
Ауылшаруашылық техникаларын жеткізуші компанияның коммерциялық директоры Ойрат Мұхамеджановтың айтуынша, біріншіден металдың қымбаттауы, екіншіден валютаның тұрақсыздығы техникалар бағасын өсіріп жатыр.
«Қазір мен балама жол ретінде Қытай, Түркия елдерін қарастырамын. Түркиялық өндіруші зауыттармен келіссөз жүргізіп жатырмыз» дейді ол.
Ал Автомобиль құрастыру, арнайы және ауылшаруашылық машина жасау басқармасының басшысы Руслан Хисамутдиновтың айтуынша, 2021 жылы 5 714 трактор, 1 400 комбайн сатып алынған. Соның 11 пайызы ғана – импорттық техника.
