Аймақтар • 01 Тамыз, 2022

Ауыл мектептеріне қолдау

153 рет
көрсетілді
3 мин
оқу үшін

«Қазақстан халқына» қоры Абай облысындағы ауыл мектептерін заман талабына сай жа­рақ­­тандыруға жәр­дем­деседі. Бұл туралы аталған қордың бас­қарма төрағасының орын­­басары Ләззат Шың­ғысбаева айтты.

Ауыл мектептеріне қолдау

Семейліктермен кездескен аталған ұйымның өкілі бүгінге дейін қор 5 қазақстандық балаға құны млрд теңге болатын «золгенсма» инъекция­сын алуға жәрдемдескенін жеткізді. Денсаулық сақтау саласынан басқа бұл ұйым білім беру саласында да қолдау көрсетуге әзір.

«Қазақстан халқына» қоры Мемлекет басшысы Қасым-Жомарт Тоқаевтың бастамасымен құрылғаны баршаға мәлім. Оның қызметті екі бағытқа арналған. Атап айтқанда, атау­лы көмек көрсету және даму бағдарламаларын іске асыру. Облыстағы көптеген ірі кәсіпорын мен іскер азаматтар бұл бастаманы бірден қолдап, қорға қомақты қара­жат аудар­ға­нын айта кеткен орынды», деді Абай облысы әкімінің орынбасары Айдын Кәрімов.

Оның айтуынша, қазір жергілікті атқарушы органдар осы бағытта жұмыс жүр­гізіп келеді. Қазіргі бас­ты міндет – қормен өзара іс-қи­мыл­дың ортақ нүктесін тауып, азаматтардың өмір сүру сапасын жақсартуға байланысты ұсыныстарды жеткізу.

Л.Шыңғысбаева қорға мыңдаған өтініш келіп түсе­тінін және басым бөлігі ден­саулық сақтау саласына қатыс­ты екенін айтты.

«Бізге келіп түскен 40 мың өтініштің басым бөлігі денсаулық сақтау саласына қатысты. Әлбетте, бұл бізді алаңдатпай қоймайды. Осы күнге дейін дамыл таппай қызмет етіп келеміз. Өйткені қорға үлкен үміт артылып отыр. Әрине бұл жеткіліксіз және әр өңірдің өзіндік ерекшелігін ескеру керек. Сондықтан қор­дан қандай көмек қажет екенін талқылау қажет», деді «Қазақстан хал­қына» қоры басқарма төрға­сының орынбасары.

Бұдан бөлек «Қазақстан халқына» қорына студенттер мен талапкерлердің ата-аналарынан 1,5 мың өтініш келіп түсіпті. Оның басым бөлігінде жастардың оқумен қатар жұмысты бірге алып жүргені айтылып, пандемияның сал­да­рынан студенттердің көп­шілігі оқу ақысын төлей алмай, тағы бірі аурудың кесірінен академиялық демалыс алуға мәжбүр болғаны жазылған. Соған сәйкес жас азаматтар кем дегенде соңғы оқу жылының ақысын төлеп беруге қолдау сұраған.

«Қазақстанда 120 жоғары оқу орны бар. Оның 75-іне мемлекеттік грант бе­рі­леді. Олар­мен конференция өткізіп, келісімшартқа отыру көзде­луде. Әр оқу орынға шәкір­тақымен 3 грант бө­леміз», деді қордың өкілі.

Қордың білім гранттарын иелену үшін үміткерлер ауыл­дық жерден, сол секілді өзінің немесе ата-анасының мүгедектік мәртебесі және әлеуметтік аз қамтылған отба­сыдан болуы шарт. Семейде бұл жобаға Alikhan Bokeikhan University, Шәкәрім атындағы университет және Семей ме­дициналық университеті қаты­сып, оларға 3 гранттан та­ғайын­далды.

Абай облысындағы ауыл мектептері де аталған қордың дамыту жоспарына енгізіліп, 17 білім беру ұйымының оқу кабинеттері заманауи құрал-жабдықтармен жарақталады.

 

Абай облысы