Көліктерге SOS батырмасын орнату міндетті емес

Комитеттің хабарлауынша, мамандар жарты жылдың ішінде мемлекеттік бақылау және қадағалау жүргізу бөлігінде 731 тексеру жүргізген. Соның ішінде 64-і – жоспардан тыс болса, 85-і – про­филактикалық бақылау. Өзге мем­лекеттік органдармен бірге жүр­гізілген тексерулер саны – 119. Ал мекемелерге бармай, сырт­тан бақылау саны 464-ке жеткен.

Тексеру кезінде 507 жағдайда бұзушылықтар анықталған. Бұл барлық тексерудің – 70%-ы. «Тексеру нәтижесі көрсеткендей, 14 мың 300 құжат негізсіз және дәйексіз берілген. Соның ішінде 57-сі сәйкестік сертификаты болса, 50-і – сәйкестік туралы декларация­лар. Бұған қоса, 162 жеке тұлғаға арналған автомобиль куәлігі мен 14 031 өлшеу құралын тексеру туралы сертификаттар (ӨҚ) негізсіз берілгені анықталды. Мем­лекеттік тізілімге енгі­зіл­меген 1 572 сертификат та бар, 821 ӨҚ жарамсыз деп танылды. Міне, осындай заң бұзушылықтар шең­берінде 81 қаулы шығарылды. Олар­ға салынған айыппұл сомасы 65 млн теңгені құрады. Бұл был­тыр­ғымен салыстырғанда екі есе көп», дейді комитет мамандары.

Еуразиялық экономикалық одақ шеңберінде де біраз жұ­мыс қолға алынып, соның аясында көліктерге «SOS» батыр­масын орнату міндеттемесі алынып тасталған. «Бұл ел азаматтары­на мұндай құрылғыларды орнатуға кететін шығындарды қыс­қартуға мүмкіндік берді», дейді Техникалық реттеу және метрология комитетінің баспасөз қызметі.

Сондай-ақ құзырлы орган электр құрылғыларының энер­гия тиімділігі туралы техни­ка­лық регламентін енгізу уақыты ұзар­ғанын хабарлады. Егер мұндай шешім қабылданса, тұрмыстық техниканың бағасы күрт қым­баттауы мүмкін. Сондықтан әзір­ше құжаттың күшіне енуі кейінге шегеріліп отыр.

Ведомствоның дерегінше, биыл Стандарттау жоспары шең­берінде 340 стандарт әзір­леніп жатыр, оның 140-ы – мем­ле­кетаралық стандарттар. «Қазірдің өзінде бірқатар әлеуметтік маңызы бар стандарттар қабылданды. Соның бірі – электрсамокаттарға қатысты стандарт. Жалпы стандарттар легі алғаш рет ғылыми-экс­перименттік зерттеулерге сүйене отырып әзірленді», деп мәлім­дейді мамандар.

Мемлекет басшысының тапсырмасы бойынша зертханалық базаны жаңғырту жұмыстарын да қолға алған ведомство Ұлттық жобаны іске асыру қорытындысы бойынша 2025 жылға қарай зертханалық базаның 30%-ын жаңғыртуды жоспарлап отыр­ғанын хабарлады. Ол үшін Жол картасы қабылданып, мемлекеттік органдармен бірлесе жұмыстар атқарылып жатыр.

Сәйкестікті растау жөніндегі құжаттар «Бірыңғай терезе» ақпараттық жүйесінің платформасы арқылы жүзеге асырылып, биылғы 19 шілдедегі жағдай бо­йынша 68 649 құжат берілген.

Комитет таңбалау жүйесін үйлестіру бойынша жұмыстар жүйелі жүргізіліп жатқанын атай келе, бүгінде ел бойынша тері, темекі бұйымдары, аяқкиім және дәрі-дәрмектер тобы бойынша міндетті таңбалау енгізілгенін мәлімдеді. Соның нәтижесінде қазынаға түскен түсімдер көле­мі де артқан. Айталық, тері бұйым­дарын таңбалау кезінде импорт бойынша кедендік баждар мен салықтардың түсімі 40%-ға – 372,3 млн теңгеден 516,2 млн тең­геге дейін өскен. Осы қызмет бо­йынша ішкі салықтар түсімі 1,5 есеге артқан.

Енді ведомство жылдың соңы­на дейін техникалық реттеу саласындағы ақпараттық жүйені өнеркәсіпке енгізу, оның ішінде адами факторды барынша азайта отырып, мемлекеттік бақылаудың бизнес-процестерін цифрландыруды ретке келтірмек. Сонымен қатар Техникалық реттеу мәселелері бойынша кейбір заңнамалық актілерге өзгерістер енгізу туралы заң жобасын әзір­леп, ұлттық зертханалық базаны жаңғырту жұмыстарын әрі қарай жалғастыруды жоспарлап отыр.