![Даңқты ұшқыштың ғасырлық мерейтойы аталуда](/media/2022/08/05/crop-7_8_643x897_o.jpg)
Қорғаныс ведомствосының басшысы екі мәрте Кеңес Одағының Батыры Талғат Бигелдиновтың ерлік жолы, оның Қазақстанның азаматтық және әскери авиациясын дамытуға, елдің мәдени нысандары мен индустриялық инфрақұрылымын салуға қосқан баға жетпес үлесін атап өтті.
«Авиация генерал-майоры Талғат Жақыпбекұлы Бигелдиновтың өмір жолы – ХХ ғасырдағы сұрапыл соғыстың ошағынан өткен батырлықтың, қажымас қайраттың, табандылықтың айқын үлгісі. Біз, батырдың ізін басып келе жатқан ұрпақ және жас буын қазақ халқының батыр ұлының жанқиярлығын мақтан етіп, ерлігін жадымызда мәңгі сақтаймыз», деп атап өтті Қорғаныс министрі.
Осы күні Ақтөбе қаласының Әуе қорғанысы күштері әскери институтындағы Әскери даңқ мұражайында экспозиция ашылды. Онда Бигелдиновтар отбасының жеке мұрағатынан алынған фотосуреттер, батыр өмірінің кей сәттерінен естелік-жәдігерлер қойылған.
Әуе қорғанысы күштері әскери институты басшылығының айтуынша, мұражай ақтөбеліктерді және Орталық Азиядағы жалғыз әскери ұшқыштар дайындайтын институттың курсанттарын тәрбиелеуге ықпал етеді.
Қазақстан әскери авиациясының даңқты ұшқышының құрметіне авиациялық базаларда, әскери бөлімдер мен оқу орындарында іс-шаралар ұйымдастырылды. Қазақтың батыр ұлына Ми-35М, Ми-8, Ми-171Ш әскери авиациясының тікұшақтарында және Су-30СМ, Су-27, Су-25, L-39 әскери ұшақтарында ұшу жаттығуларын арнады.
Сонымен қатар, бұндай шаралар Қарулы күштердің Ұлттық әскери-патриоттық орталығында да өтеді. Онда Қорғаныс министрлігінің әскери оркестрі мен ансамблі ұжымдарының атсалысуымен ұйымдастырылған салтанатты жиын мен мерекелік концерт болады.
«Ғасырлық мерейтойға орай Әуе қорғанысы күштерінің бас қолбасшысы авиация генерал-лейтенанты Нұрлан Орманбетов Қарулы күштердің Орталық әскери-тарихи музейіне елордада орнатылған Талғат Бигелдинов ескерткішінің шағын көшірмесін тапсырады. Салмағы 25 келіден асатын жарты метрлік мүсін қоладан құйылғанын айта кеткен жөн», деп жазылған хабарламада.