Шаруалар дәнді дақылдарды жинау жұмыстарын 5 шілдеден бастаған екен. Қазір жинауға жататын масақты дақылдардың барлық 121,2 мың гектарындағы жұмыс толық аяқталып, оның ішінде 37,8 мың гектардағы бидай, 83,4 мың гектардағы арпа және басқа да дәнді дақылдар шабылып, жиналған. Өнім де ауыз толтырып айтарлықтай, бастырылған астықтың алғашқы нәтижесі бойынша орташа өнімділік гектарына 21,1 центнерден айналып отыр. Өткен жылы бұл көрсеткіш 18,2 центнер болған-ды.
Биыл мал азығын дайындау да ширақ жүрді. Мамыр айының соңынан басталған шөп шабу жұмысы нәтижелі. Жылдың жоспары бойынша, 1,7 млн тонна азық жиналуға тиіс. Оның ішінде құрғақ шөп 1 524,4 мың тонна, сабан 191,5 мың тонна және 671,3 мың тонна шырынды азық дайындалуы керек болатын. Қазір диқан мен шаруа бұл межені орындауға шақ қалды. Міне, көпжылдық дақылдардың бірінші орағы аяқталып, екінші орақ жұмыстары да басталды. Дерек бойынша 827,7 мың тонна шөп, 53,3 мың тонна пішендеме, 45,7 мың тонна сабан жиналып, 22,6 мың тонна жем азығы дайындалыпты.
– Облыс бойынша 505 бірлік астық жинайтын комбайн тіркелген, оның 491 бірлігі жөндеуден өтті немесе дайындығы 97 пайызды құрады. Жалпы, күзгі дала жұмыстарына 947 бірлік ауыл шаруашылығы техникасы кіруде. Бұл қатарда 67 механикаландырылған қырман, 100 бірлік астық тиегіш, 92 астық лақтырғыш, 67 астық тазалау машинасы, 116 автотаразылар жұмылдырылуда. Ал егін жинау жұмыстарын жүргізу үшін Энергетика министрлігінен 3,2 мың тонна кепілдендірілген дизель отыны бөлінді . Қазіргі уақытта егін жинау, шөп шабу жұмыстары және ауыл шаруашылығы дақылдарының егістігін күтіп-баптау бойынша агротехникалық іс-шаралар кезең-кезеңімен жүргізілуде, – дейді облыстық ауыл шаруашылығы басқармасының басшысы Дастан Құдабаев.
Алматы облысы
