Спорт • 15 Тамыз, 2022

Әзірге бесінші орындамыз

33 рет көрсетілді

Қазақстанның спортшылары Түркияның Конья қаласында жалауы желбіреген V Ислам ынтымақтастығы ойындарын сәтті бастаған еді. Жарыстың салтанатты ашылу рәсіміне дейін 10 медаль жеңіп алсақ, одан кейінгі күндері де жерлестеріміз өрелі өнерімен өз жанкүйерлерін қуантты.

Бейсенбі және жұма күндері қор­жы­нымыз тағы бірнеше жүл­демен толықты. Ауыр атлеттер сайысында 55 кило салмақта­ғы Арли Чонтейге тең келер еш­кім табылмады. Әлем чемпионы қоссайыстың қорытындысы бойынша 253 (114+139) килоны еңсеріп, жеңіс тұғырының ең биік сатысына көтерілді. Командалық әріптесінің жеңіс­ті жолын Зульфия Чиншанло жал­ғастырды. 59 кило салмақта сынға түскен Олимпия ойындарының қола жүлдегері, әлемнің үш дүркін чемпионы 220 (95+125) килолық зілтемірді тік көтеріп, алтыннан алқа тақты. Ал 61 кило салмақта өнер көрсеткен Өтепберген Әлиев қола медальды мойнына ілді.

Таеквондошылар тартысында 73 кило салмақтағы Жансел Дениз үшінші орынға табан тіреді. Азия ойындары мен Дүниежүзілік Универсиаданың күміс жүлдегері тек түркиялық Суде Узунчавдар мен ливандық Сельман Вардтан ғана қалып қойды. Тағы бір қола медальды Иорданияның өкілі Рама Або-Алруб еншіледі. Әйел­дер кү­ресінен өткен жарыста Елена Шалы­гинаның (65 кило) асқан шеберлігіне тәнті болдық. 35 жас­тағы ардагер спортшы барлық қарсыласын қапы қал­дырып, бас жүлдені олжалады. Грек-рим күресі шеберлерінің бәсекесінде Аманғали Бекболатов (55 кило) қола медальды иемденді.

Сенбі күні Қазақстан құрама­сының қоржынына алғашқы жүлдені ауыр атлет Алексей Чуркин (73 кило) салды. Қоссайыста 315 (145+170) килоны еңсерген ол екінші сатыға жайғасты. Көп ке­шікпей Анадолы елінен тағы бір қуанышты хабар жетті. 50 метрлік қашықтыққа брасс әдісімен жүзуде Аделаида Пчелинцева алдына жан салмай, Түркия көгінде Қазақстанның әнұранын тағы бір мәрте шырқатты.

Жексенбі күнге дейінгі жағдай­ға зер салсақ, Қазақстан құра­ма­­сы 13 алтын, 9 күміс және 21 кү­міс медальмен жа­лпы есепте бесін­ші орында келеді. Бар­лығы – 43 жүлде. Алдымызда – Түр­кия (60 алтын+59 күміс+50 қола), Иран (27+23+23), Өзбекстан (20+17+26) және Әзербайжан (13+14+15) құ­ра­малары. Естеріңізге сала кетейік, Ислам ынтымақтастығы ойын­­дары 18 тамызда өз мәресіне жетеді.

Соңғы жаңалықтар

Жапонияда жер сілкінді

Әлем • Бүгін, 10:22

Ұқсас жаңалықтар