Кеше бізді көркем гимнасшы Елжана Таниева қуантты. Ол доппен жасалатын жаттығуда алдына жан салмай, алтыннан алқа тақса, шығыршық пен таспада қола медальды мойнына ілді. Ал содан бір күн бұрын ғана Елжана мен Айбота Ертайқызы командалық көпсайыста үздік үштікті түйіндеген болатын. Құрамында Сағина Мұратқызы, Айсұлу Мырзағалиева, Рената Жолдинова, Аружан Қасенова, Айдана Шаяхметова және Әсел Шүкірбай бар қазақстандық гимнасшылар бес шеңберлі жаттығуда қолаға қол созды.
Ауыр атлетикадан өткен жарыста қоржынымыз тағы екі күміс медальмен толықты. Ол жүлденің иегерлері – Арай Нұрлыбекова (76 кило) мен Айша Омарова (81 кило).
Исламиадада жүзушілеріміз де табысты өнер көрсетуде. Кеше Анадолы елінде Қазақстанның Әнұраны екі мәрте шырқалды. 100 метрге баттерфляй әдісімен жүзуде Әділбек Мусин 53.20 секунд уақыт көрсетіп, бас жүлдені қанжығасына байлады. Қандасымыз түркиялық Үміт Жан Гюрес пен өзбекстандық Эльдорбек Усмоновты басып озды. София Әбубәкірова да алтын медальды мойнында жарқыратты. Ол дәл осы тәсілмен 50 метрлік қашықтықты 27.17 секундта жүзіп өтті. Екінші және үшінші орындарды әзербайжандық Мариям Шейхализаде мен түркиялық Алина Өзкан иеленді. Шалқалай жүзуде Ксения Игнатова қола медальды еншіледі.
Дүйсенбіге дейінгі жағдайға зер салсақ, Қазақстан құрамасы 16 алтын, 15 күміс және 26 күміс медальмен жалпы есепте әлі де бесінші орында келеді. Барлығы – 57 жүлде. Алдымызда – Түркия (79 алтын+73 күміс+57 қола), Иран (32+24+38), Өзбекстан (27+24+35) және Әзербайжан (18+22+18) құрамалары.
