Каспий жағалауында өткен жарысқа Қазақстаның қосалқы құрамдағы балуандары қатысты. Солардың арасынан Сұңғат Жұбатқан (66 кило), Асқар Нарқұлов (73 кило), Ерзат Арғынов (81 кило), Ерқанат Молдағұлов (100 кило) және Еламан Ерғалиев (+100 кило) суырылып шығып, бас жүлдені олжалады. Қалған екі салмақта өзбекстандық Достон Рузиев (60 кило) пен моңғолиялық Мунхбаяр Баттогтоо (90 кило) топ жарды. Финалда екеуі де біздің дзюдошылардан айласын асырды. Әйелдер арасындағы жарыста Қытай құрама командасы мүшелерінің мерейлері үстем болды. Олар барлық жеті салмақ дәрежесінде дара шықты. Таяуда ғана Азия чемпионатының қола жүлдегері атанған Аруна Жанкелдина Ақтауда күміс медальды мойнына іліп, өз жанкүйерлерін тағы бір қуантты. Жалпы есепте Қазақстан құрамасы Қытайды алға жіберіп, екінші орынды иеленді.
Тағы бір айта кетерлік жайт, аталған жарыс Азия кубогы мәртебесіне ие. Сол себепті қатысушыларға рейтингтік ұпай беріледі.
