Серіктестік өзара сенім арқылы нығаяды

Қазақстан Президенті Нұрсұлтан Назарбаев АҚШ Мемлекеттік хатшысының орынбасары Уильям Бёрнспен кездесті, деп хабарлады Президенттің баспасөз қызметі. Кездесу барысында екіжақты қарым-қатынастардың, соның ішінде сауда-экономикалық жә­не инвестиция саласындағы бай­ла­ныстардың негізгі бағыт­тары қарастырылды. Бұдан бөлек, Қазақстанның алдағы Дүние­жүзілік сауда ұйымына кіруіне қа­тысты негізгі мәселелер талқы­ланды. Тараптар Украина мен Ауғанстандағы жағдайға қоса, халықаралық күн тәртібінің өзекті мәселелері жөнінде пікір алмасты. Мемлекет басшысы Қа­зақ­станның Құрама Штаттармен екі­жақты қарым-қатынасты белсенді дамытуға әзір екенін айтты. – Таяуда мен Гаагада АҚШ Пре­зидентімен кездестім. Біз елдеріміз арасындағы қарым-қатынасты дамыту мәселелерін, сондай-ақ, әлемде бүгінгі таңда қалыптасып отырған ахуалды егжей-тегжейлі талқыладық. Оған қоса, бірлескен мәлімдеме қабылдадық. Екіжақты ынтымақтастықты жоғары дең­гейде бұдан әрі де жалғастыру қажет, – деді Нұрсұлтан Назарбаев. У.Бёрнс Мемлекет басшысына АҚШ Президенті Барак Обаманың жылы лебізін жеткізіп, АҚШ-тың Қазақстанмен стратегиялық се­рік­тестікке деген ұзақмерзімді айнымас ұстанымын атап өтті.