Спорт • 19 Тамыз, 2022

Тұрсынғали турнирі

276 рет
көрсетілді
2 мин
оқу үшін

Бұл күндері Алматының дәл іргесінде орналасқан Талғар қала­сында Тұңғыш Президент қорының ұйымдастыруымен бокстан Қазақстанның еңбек сіңірген жаттықтырушысы Тұрсынғали Еділовтің жүлдесі үшін жасөспірімдер арасында халықаралық турнир өтіп жатыр.

Тұрсынғали турнирі

Жарыстың ашылу салтанатына Алматы облысы дене шынықтыру және спорт басқармасының бастығы Нұрбақыт Теңізбаев, «Динамо» спорт қоғамы төрағасының бірін­ші орынбасары Асқар Омарқұлов, Олимпиада чемпионы Ермахан Ыбырайымов, Олимпия ойын­дарының күміс жүлдегері Мұхтархан Ділдәбеков және тағы басқа атағы алысқа жайылған боксшылар мен спорт ардагерлері қатысты.  

Тұрсынғали Нұржақыпұлы ке­зінде еліміздегі танымал бокс­шы­лардың бірі болды. Республикалық және Бүкілодақтық турнирлерде жүлде алып, КСРО спорт шеберінің күміс белгісін кеудесіне тақты. Тоқсаныншы жылдардың басын­да Ермахан Ыбырайымовты жат­тық­тырып, өз шәкіртінің Атланта Олимпиадасында қола және Сид­ней Олимпиадасында алтын медаль алуына сүбелі үлес қосты. Соны­мен қатар Ермаханның әлем чемпионатының күміс пен қола жүл­дегері, екі дүркін құрлық чемпионы, Азия ойындарының жеңімпазы деген атақтары бар.

1997 жылы Еділов ұлттық коман­дамыздың тізгінін ұстады. Сол тұста отандық былғары қолғап шеберлері халықаралық аренада зор табыс­тарға қол жеткізді. Ең басты табысымыз – ғасырлар тоғы­сында алауы тұтанған Сидней Олимпиадасында Қазақстан құра­масының төрт бірдей боксшысы­ның финалға шығуы. Нәтижесінде, Бекзат Саттарханов пен Ермахан Ыбырайымов бас жүлдені олжаласа, Болат Жұмаділов пен Мұхтархан Ділдәбеков күміс медаль иеленді. Бір өкініштісі, арада 22 жыл өтсе де, жасыл құрлықтағы сол нәтижені біздің жуан жұдырықты жігіттеріміз әлі де қайталай алған жоқ.

Содан кейінгі жылдары да Тұр­сынғали Еділов жаттықтыру­шылық қызметте жүріп, зор бедел жиды. Оның шәкірттері арасында Олим­пия ойындары мен әлем чемпионаттарына қатысып, халықаралық жа­­рыстарда жүлде алғандары да бар. Ал Талғарда әйгілі бапкердің құрметіне өтіп жатқан турнирде Қазақстанның бірқатар аймақтары және Өзбекстан мен Қырғызстаннан келген 150-ден аса балғын былғары қолғап шебері бақ сынауда.