Заманауи фотоэлектрлік панельдерді пайдалану станцияның ауданын азайтуға мүмкіндік берді, ал эксперименттік роботтар олардың қызмет көрсетуін жеңілдетеді.
ҚР Энергетика министрлігінің деректері бойынша, 2022 жылдың бірінші жартыжылдығында жаңартылатын энергия көздеріндегі барлық электр станцияларының белгіленген қуаты 2,3 гигаваттан асты. Оның ішінде ең көп көлемі 1,15 гигаватт қуатпен күн электр станцияларына тиесілі.
Енді оларға энергожүйенің жаңа объектісі - Қарағанды облысы Балқаш қаласынан 10 км қашықтықта салынған Kaz Green Energy компаниясының күн электр станциясы қосылды. Бірінші кезеңде оның қуаты - 50 мегаватт. Станция іске қосылып, елдің бірыңғай энергия жүйесіне электр энергиясын жеткізе отырып жұмыс істеп тұр.
Станцияның жалпы ауданы қазір 70 гектарға жуық, онда 94 150 фотоэлектрлік панель орналасқан. Олардың әрқайсысының қуаты 530 ватт және одан жоғары.
Жаңа буынды панельдерінің қуаты басқа қазақстандық станцияларда қолданылатын панельдерге қарағанда орта есеппен екі есе жоғары, бұл электр станциясының ауданын азайтуға мүмкіндік берді.
Сондай-ақ кейбір панельдерде роботтардың эксперименттік үлгілері орнатылған, олар күн панельдерін шаңнан тазартады, бұл қызметкерлердің жұмысын жеңілдетеді. Сонымен қатар жабдықты жууға арналған арнайы машина да сатып алынды.
Жоба бойынша станция күніне орташа есеппен 295 мың киловатт-сағат электр энергиясын өндіреді, ал жоба бойынша жылына – әр түрлі ауа-райы жағдайларында және жыл мезгілдеріне байланысты әр түрлі өндіруді ескере отырып, 79 млн киловатт-сағаттан астам электр энергиясын өндіреді.
«Бәйтерек» холдингінің жобалармен жұмыс жөніндегі департаментінің директоры Әсет Тәжікенов Kaz Green Energy сияқты жобаларды қолдау Ұлттық холдингтің басымдықтарының бірі екенін атап өтті.
«Жаңартылатын энергия көздерін пайдалануға бағытталған «жасыл» жобаларды іске асыру үшін Холдингтің еншілес ұйымдары жалпы сомасы 188 млрд теңгеден асатын 12 ірі инвестициялық жобаны қолдады», дейді ол.
Нәтижесінде 2021 жылдың өзінде қаржыландырылған жобалар 811 млн киловатт-сағат электр энергиясын өндіріп, бюджетке 1,5 млрд теңгеге төлем жасады.
