Басшылықтың жіті бақылауы мен іркіліссіз атқарылған жұмыстардың нәтижесінде ауыл жұртының өтініш-талабы орындалып, 600 абоненттің газға қосылуына мүмкіндік туды. Жалпы ауданда қазір 20 503 адамның немесе тұрғындардың 43,7 пайызының көгілдір отынға қосылуына жағдай жасалған.
2020-2022 жылдарға Көксу ауданындағы 8 елді мекенді газдандыруға бюджеттен 2,023 млрд теңге бөлінген болатын.
Осы күнге дейін Мұқырыны қосқанда 5 ауыл газға қол жеткізсе, жыл соңына дейін 4 мыңнан астам тұрғыны бар тағы үшеуі – Бесқайнар, Жамбыл, Мәмбет ауылдары да газға қосылады. Тағы 12 ауылды газдандыруға жобалық-сметалық құжаттама әзірленіп жатыр. Олардың құрылыс-монтаж жұмыстары 2023-2024 жылдары жүргізіледі.
«Газға қосылу бағасы 30 метрге дейін орташа 145 мың тг, 1 текше метр газдың құны 30 теңге 33 тиын және әлеуметтік аз қамтылған отбасылар тобына жататындарға 30 пайызға дейін жеңілдіктер қарастырылған. Оған қоса қажетті пеш, дабыл қаққыш және есептегіш (счетчик) алуға 10 айға дейін еш пайызсыз бөліп төлеуге болады. Алдағы қыркүйек айының 20-нан кейін Бесқайнар, Жамбыл, Мәмбет ауылдары да газға қосылады», дейді Көксу ауданының әкімі Марлен Көлбаев.
Оның айтуынша, газға қосуды BSP GROUP LTD, ST LTD, ST GAZ, «СК Муслим», «Аякс-78» және «Сұңқар- 2002» ЖШС қамтамасыз ететін болады.
Мұқырыда алғашқы болып үйіне газ тартылған тұрғын – 44 жыл жергілікті мектепте ұстаз болған, жалғыз тұратын ардагердің бірі, Еңбек Ері Нұрмолда Алдабергеновтің қызы Рәбиға Алдабергенова. Оның қуанышында шек жоқ. Бұл үйге «BSP групп» компаниясы жергілікті әкімдікпен бірлесіп газды тегін қосып берген екен. Зейнеткер газ тарту ісінің басы-қасында жүрген жандарға алғысын жаудырды.
«Үйіме тегін газ қосып берген демеушілерге, барша азаматқа айтар алғысым шексіз. Егде адам болған соң жүректің ауруы, бел омыртқамда сырқатым бар, сол үшін маған от жағып, күл шығарған қиын. Ауылға газ келгені маған үлкен демеу болды. Қыста аяз 40 градусқа барғанда газдың қысымы төмендеп кететіні заңды құбылыс. Оны өзім химия пәнінің мұғалімі ретінде жақсы білемін. Сондықтан қатты аязда қосымша қор болсын деп 1-2 тонна көмір алып қойдым. Ауылға жеткен табиғи газдың қызығын барша тұрғын көре алатынына қуаныштымын», дейді Р.Алдабергенова.
Міне, енді көптен күткен Мұқыры ауылындағы 481 үй көмір жағудан құтылып, оның орнына газға қосыла алады.
Жетісу облысы
