«Біздің елімізде спорт әр түрлі жастағы, ұлт пен кәсіптегі көптеген адамдардың басын біріктіреді. Жылдан жылға спорт қауымдастықтары мен секцияларының саны өсіп, спортпен тұрақты айналысатын азаматтардың саны артып келеді. Әрине, бұл жерде жаттықтырушылардың, төрешілердің және спорт менеджерлерінің еңбегі зор. Мұның бәрі олардың таңдаған мамандығына деген ынтасы мен адалдығына тікелей байланысты», деді Дәурен Абаев.
Салтанатты іс-шара олимпиада резервінің облыстық және республикалық мамандандырылған мектеп-интернат-колледждерінің жұмысы мәселелері жөніндегі кеңес шеңберінде өтті.
«Қазір мектеп-интернат-колледждерде таяу жылдары өтетін ірі жарыстарда ел намысын қорғайтындар оқып жүр. Бір сөзбен айтқанда, сіздер Қазақстанның спорт элитасын даярлап жатырсыздар. Бірақ өкінішке қарай, даярлаған шәкірттердің қазіргі нәтижелері алаңдаушылық тудырады. Көптеген параметрлер бойынша бірқатар мектеп-интернат-колледждердің көрсеткіштері кәдімгі спорт мектептерінен төмен. Бұл жаттығу процесінде, психологиялық даярлықта, оқыту әдіснамасында олқылықтардың бар екенін білдіреді», деді министр.
Оның айтуынша, мектептердегі кадр мәселесіне ерекше назар аудару қажет. Мектеп-интернат-колледждерде үздік жаттықтырушылар мен әдіскерлер жұмыс істеуге тиіс.
Дәурен Абаев сондай-ақ мектеп-интернат-колледждерге оқушыларды қабылдау кезінде бақылауды күшейтуді, жоғары сынып және колледж спортшыларының нәтижелеріне жүйелі талдау жасауды, сондай-ақ қаржылық жағдай мен білікті мамандардың болуын ескере отырып, спорт түрлерін оңтайландыруды қарастыруды тапсырды.
