Мектептің беткеұстары болды. Алматы зооветеринарлық институтын үздік бітірді. Өзі туып-өскен өңірде шаруашылықта бас зоотехник қызметін абыроймен атқарды. Кейін партия, кеңес жұмысына араласты. Шымкент, Атырау облыстарында басшылық қызметтер атқарды. Алғабас, Келес аудандарында аудандық партия комитетінің бірінші хатшысы болды. Жасаған жұмыстары Димаш Қонаев, Асанбай Асқаров сияқты биік тұлғалардан лайықты бағасын алды. Түрлі деңгейде басшылық қызметтер атқарған Хасан Бектұрғанов, Егемқұл Тасанбаев, Төлепбек Назарбеков, Әбжаппар Жылқышиев, Борамбек Шүкірбеков, Зауытбек Тұрысбеков, Әбдікәрім Бектаев, Елтай Тұрғымбеков, Амалбек Тшанов, Бекет Тұрғараев, Әбдіғани Ташқараев, Анарбек Орманов, Әбілқасым Досболов, Досыбай Шерімқұлов, Исмат Тұрсынқұлов, Данабек Батыршаев, Қойшыбай Әріпбаев сияқты замандас аға-інілерімен етене араласып, ел игілігі үшін қоян-қолтық қызмет етті.
Сол игілікті еңбегінің нәтижесінде алты орденмен, жиырма шақты медальмен марапатталды. Зейнетке шыққан соң да қоғамдық қызметтен қол үзбей, тәуелсіз еліміздің туын тіктей түсуге атсалысты. Осы еңбегі еленіп, өңіріне «Құрмет», «Шапағат», «Парасат» ордендерін тақты. Оңтүстік Қазақстанның және осы облыстағы бес ауданның Құрметті азаматы атанды. Алла жазып ұзақ та мағыналы ғұмыр кешті. Ақырғы демі біткенге дейін халықпен араласты, жас ұрпақ тәрбиесіне ерекше көңіл бөлді. Мұсылманның қасиетті бес парызының бірі қажылық сапарын да өтеді. Қолы бос болып көрмеген дағдысымен өлкетану мәселесімен, шежіре-деректер жинаумен айналысты. Артында «Мен де бір Қазығұрттың перзентімін» атты құнды кітап қалдырды. Одан да зоры балаларының сүйікті анасы, өзі қалап қосылған аяулы жары Рабигүл апамыз екеуінен бес ұл, немере, шөберелер көрді. Бір өкініштісі, апамыз ертерек қайтыс болып, ұрпақтарының қызық-қуаныштарын көре алмай кетті.
Жасы жерортадан ауғанда үлкен кісінің жалғыз қалғаны ауыр соғады екен. Осындай сәтте бұл өмірдің ыстық-суығын бірге көріп, халықтың сүйіспеншілігі мен құрметін қатар өткізген жұбайы Зәмзагүл қажы жеңгемізге де разымыз. Ол кісі сырласы да, сыйласы да бола білді. 93-ке қараған шағында фәни дүниеден бақилыққа аттанған ардақты әкеміздің, атамыздың шаңырағының отын өшірмей, жыл бойы әр бейсенбісін құр жібермей аруағын аунатты.
Артында қалған ұрпақтары 28-ші тамызда марқұмға Құран бағыштап, ас бермекші.
Өтетін мекенжайы: Шымкент қаласы, Ө.Жәнібеков көшесі, 65. «Баққон» мейрамханасы. Уақыты – 13:00.
Құрметпен,
Әжіметовтер әулеті
