Михаил ПОДОЛЯКОВ, Ұлы Отан соғысының ардагері: «Мәскеудегі парадқа тірілер парызын өтеу үшін барамын»

Ұлы Отан соғысындағы Жеңістің 69 жылдығына орай Мәскеуде өтетін әске­ри парадқа қатысу үшін Ресейдің Қазақстан Рес­пуб­ликасындағы елшілігі біздің елімізден бес ардагерге шақырту жасады. Соның бірі болып, Ресей астанасындағы парадқа қатысу құрметіне ие болдым. Соғыс салған жараның орны әлі сыздайды. Біз ауыр жаралансақ та, аман қалдық. Ал мыңдаған қанды көйлек жолдастарымыз туған жердің топырағы да, ауасы да бұйырмай, майдан даласында бір-бір төмпешікке айналып, қалып қойды. Олардың да елге қайтып келіп, бала сүйіп, ұрпақ тәрбиелеуіне, бақытты болуға, елдің тәуелсіздігін, бүгінгі бейбіт өмірін көруіне толық құқы бар еді ғой. Олар қыршын кетті, біз тірі қалдық. Қазір қатарымыз да сиреп кетті. Қостанай облысы бойынша бүгіндері 435 майдангер ғана Жеңіс мерекесін атап өтіп отыр. Соғыста ерлікпен қаза тапқандарды еске алу, ұмытпау, жастарды патриот етіп өсіру – тірілердің парызы. Мен майданға аттанғанда әлі 17 жасқа толмаған кезім еді. Жасы жеткен ер-азаматтарды майданға алып, біз секілді балаларды фабрика-зауыт училищесіне оқуға жіберді. Мен Қарағандыдағы ФЗУ-ға оқуға бардым. Қасымда екі досым бар, үшеуміз майданға сұранып, әскери комиссариатқа талай бардық. «Жастарың жет­пей­ді», деп шығарып салады. Бірде майданға солдаттар апара жатқан эшелонға жасырынып мініп, тартып отырдық. Біздің училищедегі тәрбиешіміз осы вагонға мінген болатын, сол кісіні де арқа тұттық-ау деймін. Сонымен пойыз жүріп кеткен соң, бізді қайта түсіріп тас­тамады. Жасымызды бір жас үлкей­тіп жазып, сол эшелоннан түспей, майданға кірісіп кетке­ні­мізді бір-ақ білдік. Соғыстың қырғынын бас­тан өткердім. Солтүстік Батыс майданда, Курск иіні үшін болған шайқаста болдым. Украинаны азат ету ұрыстарына, Корсунь-Шев­ченко операциясына қатыс­тым. Бұл ауыр, шығыны көп ұрыс болғаны тарихтан белгілі. Сол шайқаста мен ауыр жараландым. Ата-анама «қара қағаз» келіпті. Ал мені госпитальдан шыққан соң, Полтавадағы танк училищесіне жіберді. Жеңісті сонда жүріп қарсы алдым. Мәскеудегі әскери парадты көру мен үшін үлкен құрмет деп білемін. Қазір әрқайсысы бөлек ел болса да, сол кездегі Кеңес Одағы құрамындағы республикалардың барлығы тізе қосып, фашизмге қарсы бірге күресті. Мәскеуді біз­дің қазақстандықтар жаудан қорғады. Мен парадты тамаша­лап тұрып, майдандастарымды еске аламын. Егер менен мәс­кеу­ліктер, парадты қызықтауға келген өзге де қонақтар сұраса, Тәуелсіз Қазақстаным туралы айтып беремін. Мәскеуден келген соң, Қостанайдағы жастарға, балаларға парад туралы, Ұлы Отан соғысындағы менің замандастарым, достарым жасаған ерлік істер туралы әңгімелеуден жалықпаймын. Олар бізге қарап Отанын қорғайтын патриоттық тәр­бие алуы тиіс. Мәскеу парады өзге елде болса да, миллиондардың со­ғысқа, фашизмге ортақ қарсы­лығын, бейбітшілік тілегін паш етеді. Қостанай.