Германияның BORA-hansgrohe клубы сапында өнер көрсетіп жүрген ирландиялық спортшы 193,2 шақырымдық қашықтықты 4 сағат 05 минут 53 секундта жүріп өтті. Осының алдындағы 2-кезеңде де Беннет мәре сызығын бірінші болып қиған еді. Ал бұл жолы екінші және үшінші орындарды даниялық Мадс Педерсен Trek-Segafredo мен ұлыбританиялық Даниэль Маклэй Team Arkéa Samsic иеленді. «Астананың» өкілі Евгений Федоров мәре сызығын 26-шы болып қиып өтті.
Жалпы есепте Нидерландтың Jumbo-Visma командасының намысын қорғап жүрген 26 жастағы италиялық саңлақ Эдоардо Аффини көш бастап келеді. Оның уақыты – 8 сағат 20 минут 07 секунд. Одан кейінгі орындарда да дәл сол клубтың мүшелері. Олар – нидерландтық Сэм Оомен мен словениялық Примож Роглич. «Астананың» сапындағы италиялық легионер Винченцо Нибали 61-сатыға жайғасты.
