Көрмеге халқымыздың ғасырдан ғасырға жалғасып келе жатқан мәдениеті мен салт-дәстүрін бейнелеген зергерлік бұйымдар, киіз басу, гобелен, керамика және тері өңдеу секілді сан түрлі өнерді игерген Берік Әлібай, Зейнелхан Мұхаметжан, Сержан Баширов секілді жиырмадан аса қазақстандық қолданбалы өнер шеберлерінің жұмыстары қойылды. Аталған шеберлердің қолынан шыққан әрбір бұйым – өткен мен бүгінгіні сәтті сабақтастыра білген ұлттық бояуымен ерекшеленеді. Сонымен қатар гобелен шеберлерінің асқан шеберлік пен көркем композицияда бірлесіп жасаған дәстүрлі «құрақ» және киіз үйдің керегесін өңдеуге арналған жұмыс үстелінің инсталляциясы жұртшылықтың қызығушылығын оятты.
Мәдени іс-шараның ашылуында Ұлттық музей директорының орынбасары Абай Сатыбалдин көрменің маңызына тоқталып, оған 180-ге жуық туынды ұсынылғанын айтты.
«Ұлттық қолөнеріміз сонау көшпелі кезеңнен бастап, бүгінге дейін өз әсемдігімен қолданыстан қалмай келе жатқан асыл қазынамыз. Өнер шеберлерінің әр кезеңдегі түрлі бағытта бедерлеген ғажайып дүниелердің мәдени-рухани кеңістігіміздегі алған орны зор. Сондықтан көрмеге ұсынылған әрбір туынды келушілердің жүрегінен ерекше орын алатынына сенімдімін», десе белгілі тарихшы ғалым Шайзада Тоқтабаева әлемдік мәдениеттің дамуына үлес қосқан тарихи жәдігерлерімізді ұлттық мұрамыз ретінде сақтап қана қоймай, оны ұрпақ санасына сіңіріп, кеңінен насихаттау керек екендігін сөз етті.
Қысқасы, музей төрінде сән құрған сәндік-қолданбалы өнер туындылары көрмені тамашалауға келгендердің көңілінен шықты.
