Хоккей. Қазақстан құрамасы Германияға буллиттен есе жіберді

АСТАНА. 10 мамыр. Беларусь астанасы – Минск қаласында кеше басталған хоккейден әлем чемпионатының бірінші туры ойналып бітті. Оның барысы тағы да сенсация әкелді. Бұл туралы Чемпионат.Ру хабарлады. Осы күні Қазақстан құрамасы да өзінің чемпионаттағы бірінші ойынын өткізді. Ол Германиямен кездесуде тек буллиттен ғана есе жіберді – 1:2. Матчтың негізгі бөлігі 1:1 есебімен аяқталды. Содан кейінгі овер-таймда осы есеп өзгерген жоқ. Ал кездесуде есепті қазақстандық Андрей Гаврилин ашты. Немістер сол бірінші кезеңнің соңында есепті теңестірді. Бұдан әрі командаларға шайба салудың реті келмеді. Ал кеше түнде Чехия Словакияны овер-таймда тізе бүктірсе, АҚШ Беларусьті 6:1 етіп талқандап шықты. Бүгін ойналған қалған матчтардың арасында Латвияның финдерді 3:2 етіп негізгі уақытта ұтып кеткені шынында сенсация болды. Қалған матчтар мынадай нәтижелер әкелді: Италия – Норвегия 0:3, Швеция – Дания 3:0. Енді бүгін түнде Канада – Словакия, АҚШ – Швейцария арасында ойындармен екінші тур басталады. Ертең, 11 мамыр күні Франция – Италия, Норвегия – Дания, Швеция – Чехия, Германия – Латвия, Финляндия – Ресей командалары күш сынасады. Ал Қазақстан хоккейшілері алаң иелері – белорустармен доптаяқ түйістіреді. Дамир Қожамқұл. Дереккөз: Чемпионат.Ру. Фото: Чемпионат.Ру.