Санкт-Петербург қаласында қазақтың этно-ауылы ашылады

АСТАНА. 12 мамыр. 17 мамырда Санкт-Петербург қаласында Астананың мәдени күндері басталады. Бұл туралы astana.kz сайты хабарлады. Астананың Санкт-Петербургтегі күндері аясында ұлтымыздың рухани құндылықтарын насихаттау бағытында арнайы «Қазақ ауылы» экспозициясы құрылады деп күтілуде. Бұл этно-ауылмен танысуға келгендер қазақ қолөнершілерінің шеберлік сағаттарына қатысуға мүмкіндіктері болады. Сондай-ақ, «Қазақ ауылына» ат басын бұрғандар ұлтымызға тән қолөнер бұйымдары: ши, басқұр, сырмақ, кесте, кілем, қамшы және тағы басқа да дүниелермен танысады. Бұдан басқа, әдет-ғұрып, салт-дәстүрлеріміз бен ырым-сенімдеріміз де келушілердің назарына ұсынылмақ. Әрине, мұндай мәдени-танымдық шаралар ұлттық ән-күйсіз, бисіз өтуі мүмкін емес. Сондықтан, питерліктер алдында Astana ballet би ұжымы, «Солистер академиясы» мемлекеттік камералық оркестрі өнер көрсетпек. Бұл шара аталған екі қала арасындағы іскерлік байланыстарды нығайту мақсатында қолға алынып отыр. Жолдыбай Базар. Дереккөз: astana.kz. Фото: arnapress.kz.