«Астана-Инвест-2014» форумында елордаға инвестиция тарту мәселесі қаралады

АСТАНА. 12 мамыр. 21 мамырда Астанада «Астана-Инвест-2014» V Халықаралық инвестициялық форумы өтеді. Бұл туралы egemen.kz тілшісі хабарлады. Бұл жиын осыған дейін хабарлағанымыздай, 21-23 мамыр аралығында өтетін VII Астана экономикалық форумы аясында ұйымдастырылғалы отыр. «Астана-Инвест» форумы Үкіметтің қолдауымен және тікелей ықпал етуімен жыл сайын өткізіліп келеді. Мұны қолға алудағы негізгі мақсат – Астананы дамыту, оған инвестициялар тарту, халықаралық ынтымақтастықты арттыру және қаланың тартымдылығын насихаттау. Нақтылай айтқанда, елорданың  инвестициялық мүмкіндіктерін көрсете отырып, отандық және шетелдік компанияларды инвестиция құюға ынталандыру көзделген. Форумға 400-ге жуық адам қатыспақ. Олардың арасында ұлттық компаниялардың, даму институттарының, шетелдік компаниялар мен қаржылық құрылымдардың өкілдерімен қатар, астаналық кәсіпкерлер де болады. Бұл басқосуда Еxpo-2017 халықаралық көрмеcіy өткізуге елорда инфрақұрылымын дайындау мен бірқатар өзге де мәселелер күн тәртібіне шығарылады. Бұдан бөлек, форумға қатысушылар қаланың индустриалдық паркін көру кезінде инвестициялық жобалармен де кеңінен таныса алады. Жолдыбай Базар. Дереккөз: egemen.kz. Фото: astana.gov.kz.