Зерттеулер мен жартылай өнеркәсіптік сынақтар «Солтүстік Қатпар» ЖШС-ның тапсырысы бойынша вольфрам кендерін қайта өңдеуге маманданған ҚХР-дың жетекші зерттеу орталықтарының базасында өткізілді. Алынған мәліметтер негізінде байыту фабрикасы мен гидрометаллургиялық зауытты жобалау үшін технологиялық регламенттер әзірленді.
«Флотоконцентрат үлгісінде күшәланың болмауы және жалпы құрамында бөгде қоспалардың аз болуы ерекше маңызды. Флотоконцентраттан алынған аммоний паравольфраматының үлгісі барлық нормативтік талаптарға сәйкес келеді. Соңғы өнімге вольфрамды алудың жоғары деңгейіне қол жеткізілді», деді «Солтүстік Қатпар» ЖШС бас технологы Ғани Құлмұхамедов.
Жоғарғы Қайрақты кен орны Қазақстан үшін стратегиялық тұрғыда маңызды. Мұнда Measured+Indicated+Inferred санатындағы JORC стандарттары бойынша ресурстар көлемі 712 мың тонна вольфрам үштотығын құрайды. Алайда минералды құрамның ерекшеліктеріне байланысты бұрын жасалған технологиялар экстракцияның жоғары деңгейіне сенуге мүмкіндік бермеді.
Айта кетелік, Жоғарғы Қайрақты вольфрам кен орны Қарағанды облысының Шет ауданында, Қарағандыдан оңтүстікке қарай 130 шақырым жерде орналасқан. Кен орнын игеру жобасының операторы «Солтүстік Қатпар» ЖШС – «Taý-Ken Samuryq» UTK» АҚ-ның 100% еншілес кәсіпорны. Жобаның ТЭН-ін әзірлеу бойынша жұмыстар жүргізілуде.
