27 тамыз күні сағат 17:50 шамасында Жедел басқару орталығының 102 пультіне «Юбилейный» бау-бақша қоғамында атыс қаруының қолданылуымен төбелес болып жатқаны туралы хабарлама түскен.
Полицейлер оқиға орнынан оқ жарақатын алған екі ер адамды – 31 жастағы және 25 жастағы Сарыкөл ауданының тұрғындарын тапты. Жәбірленушілер дереу ауруханаға жеткізілді.
«Оларға медициналық көмек көрсетілді. Денсаулық жағдайлары қанағаттанарлық. Күдікті оқиға орнынан қашып кеткен. Бұған дейін де сотты болған облыс орталығының 38 жастағы тұрғыны бір сағаттан кейін қаланың солтүстік бөлігінде ұсталды. Қазіргі уақытта уақытша ұстау изоляторына қамалды. Атыс қаруы тәркіленіп, сараптамаға жіберілді. Сондай-ақ атыс қаруын сақтау және жасау фактілері бойынша процессуалдық шешім қабылданып жатыр», делінген полиция мәліметінде.
Қазіргі уақытта аталған факті бойынша «Адам өлтіруге оқталу» бабымен сотқа дейінгі тергеу басталды.
