44 жастағы испандық бұған дейін денсаулығына шағымданып көрмеген адам екен. Қазақстанның танымал туристік бағыттары бойынша саяхаттап көру үшін Мадрид – Алматы бағытында ұшып келе жатып, қонуға бірнеше сағат қалғанда өзін нашар сезіне бастайды.
«Ұшақта мойным ауырып, күрт түрім бозарып кетті, қайта-қайта құстым. Содан кейін сол қолым мен сол аяқта әлсіздік пайда болды. Алматы әуежайына қонған соң мені жедел жәрдем дәрігерлері күтіп алды», деп еске алады сол күнді Фернандо Боделон.
Турист №4 қалалық аурухананың қабылдау бөліміне келген кезде дәрігерлер оның жағдайың ауыр деп бағалаған. Аурухана нейрохирургтері шетелдік қонақтың өмірі үшін 27 күн бойы күресті.
«Миға жасалған КТ оң гемисфераның қыртыс асты ядролары аймағында қарыншалық жүйенің бұзылуын, оған қоса геморрагиялық типті ми қан айналымының жедел бұзылуын, мидың ісінуін көрсетті. Науқас шұғыл жансақтау бөліміне жатқызылды», дейді №4 қалалық клиникалық аурухананың қабылдау бөлімінің меңгерушісі Магадин Хайроев.
Туристің өмірін сақтап қалу үшін оған жедел түрде операция жасау қажет болып, оны нейрохирургия бөлімінің меңгерушісі Нұржан Әжібеков, ассистент Ельдар Бесенов пен анестезиолог Маржан Мусина қолға алды. Операция 60 минутқа созылып, сәтті аяқталды. Дәрігерлер мидың қан айналымын қалпына келтіре алды.
«Біз науқасқа ми ішілік гематома дренажын жасадық. Операциядан кейінгі кезең тұрақты түрде ауыр өтіп, кейіннен оңала бастады. Дәрігерлердің бақылауынан кейін Фернандоның жағдайы жақсарып, ауруханадан шығарылды», дейді емдеуші дәрігер, №4 қалалық клиникалық аурухананың нейрохирургі Алдоңғар Айсауытов.
Ал Ф.Боделон ауруханадан шыққаннан кейін бірден Испанияға оралыпты, қазір оның оңалту курсынан өтіп жатқан жайы бар. Болашақта турист орындалмаған сапарын жалғастырып, екінші туған жері – Қазақстанға қайта оралуды жоспарлап отырған көрінеді.
«Мен бұл клиниканы, дәрігерлері мен қызметкерлерін қашан да ыстық ілтипатпен еске алатын боламын. Маған өмірге екінші рет оралуға мүмкіндік бергендеріңіз үшін рақмет!», дейді Ф.Боделон.
АЛМАТЫ
