Әлемдік рейтингте 22-орында тұрған Елена Рыбакина іріктеу турнирінде жеңімпаз атанған 21 жастағы Францияның жас дарыны Клара Бюрельмен шеберлік байқасты. Жерлесіміздің бұл кездесуде жеңіске жететініне ешкімнің күмәні болған жоқ еді. Алайда сол күні Клара өте керемет ойнап, Еленаны жер сипатып кетті. Бір жарым сағатқа созылған сайыс 4:6, 4:6 есебімен аяқталды.
WTA тізімінде 37-орында тұрған Юлия Путинцева тұсаукесер кездесуін сол күні, яғни 31 тамызда 21 жасқа толған Аманда Анисимовамен өткізді. Өзінің жастығына қарамастан АҚШ теннисшісі осы күнге дейін біраз белесті бағындырып та үлгерген. Атап айтсақ, ол 2019 жылы Ролан Гарростың жартылай финалына дейін жетіп, биыл Уимблдонның ширек финалында өнер көрсетті. Әлемдік рейтингте 20-орынға жайғасқан Аманда WTA турнирлерін екі рет ұтып, басқа да дүбірлі додаларда өзінің айшықты өнерімен көзге түсті. Десек те бұл тартыста Юлия барын салып, жеңісті қарсыласының уысынан жұлып әкетті. Есеп – 6:3, 6:3. Енді Путинцева германиялық Юле Нимайермен кездеседі.
25 жастағы Александр Бублик жастар буынының өкілі Юго Гастонмен күш сынасты. 26 қыркүйекте 22 жасқа толғалы отырған қарсыласы АТР рейтингінде 71-орынға тұрақтаған. Осыдан төрт жыл бұрын Жасөспірімдердің дүниежүзілік олимпиадасында жеңіс тұғырының ең биік сатысына көтерілген Францияның өрені 2020 жылы Ролан Гарростың төртінші кезеңіне шығып, көпшілік назарын өзіне аударған еді. Бұл бәсекеде жерлесіміздің мықтылығы еш күмән туғызған жоқ. 1 сағат 46 минутқа созылған ойын 6:4, 6:4, 6:4 есебімен аяқталды. Екінші кезеңде Бублик испаниялық Пабло Карреньо Бустамен ойнайды.
Бір айта кетерлігі, биылғы US open турниріне әлемге әйгілі теннисшілердің біразы қатыспады. Оның өзіндік себептері де бар. Мәселен, әлемнің екінші ракеткасы, германиялық Александр Зверев Нью-Йоркке жарақатына байланысты келмеді. Даңқы жер жарған Швейцарияның мақтанышы Роджер Федерер әлі де ем-дом қабылдап жатқан көрінеді. АТР тізімінде алтыншы орында тұрған Сербияның саңлағы Новак Джокович коронавирустан вакцинация алудан бас тартқаны үшін тағы бір дүбірлі додадан шет қалды. Әйелдер арасында Анжелика Керберді корттан көрмейміз. Немістің атақты ойыншысы декреттік демалыста.
Аталған турнир басталған бетте бірқатар сенсациялық нәтиже тіркелгенін де атап өткеніміз жөн. Әлемнің кезіндегі бірінші ракеткасы, румыниялық Симона Халеп 20 жастағы украиналық Дарья Снигурге жол берсе, Ресейдің мықтысы Дарья Касаткина есімі көпшілікке беймәлім ұлыбританиялық Хэрриет Дарттан ұтылды. Ал Грекияның мақтанышы Стефанос Циципас колумбиялық Даниэль-Элаи Галанға есе жіберді. Е.Рыбакина да солардың кебін киді.
