Майдангерлер мен сарбаздарға құрмет

Отан қорғаушы күні мен 9 мамыр мерекесін қарағандылықтар зор салтанат және көңіл-күйі өрлеуі үстінде атап өтті. Облыс әкімі Бауыржан Әбдішев осы көктемде әскер қатарына шақырылушыларды шығарып салуға қатысумен бірге, соғыс ардагерлерінің бір тобын қабылдап, барша адамзатқа қастерлі күнмен құттықтады. Әрқайсысына 80 мың теңгеден тарту жасалса, сондай-ақ, Ауғанстандағы айқастарда ерлігімен ерекше көзге түскен жауынгерлік Қызыл Ту орденінің иегері, І топтағы мүгедек Мейрам Қадырбаевқа жеңіл көлік тарту етілді. Қалалар мен аудандар тұрғындары орталық алаңдарда, саябақтарда майдангерлермен бірге бас қосып, оларға өнерден шашу шашты. Астанада өткен әскери парад қала көшелерінде орнатылған теледидарлар арқылы тікелей көрсетілді. Екінші дүниежүзілік соғысқа өңірден 60 мыңға жуық азамат қатысып, 6587-і жауынгерлік орден және медальдармен марапатталды. Соның ішінде 33-і Кеңес Одағының Батыры атағын алса, жеті адам «Даңқ» орденінің толық иегері болды. Бұл жылдарда Қарағанды мен Жезді, Балқаш пен Теміртау қорғаныс өнеркәсібін көмір, марганец, мыс, болатпен үздіксіз қамтамасыз етіп отырды. Майданға аттанған әкелері мен ерлерінің орнында шахталарда 12 мың әйел еңбек етті. 3 бис шахтасының шахтерлері Жәкен Мұқанова, Күләш Құлжановалардың ерен еңбектері 1941 жылы желтоқсанда Совинформбюро арқылы хабарланды. Бүгінде жасы 90-нан асып, 100-ге жақындаған Талғатбек Абдразақов, Семен Красногутский ақсақалдардың үйлеріне барып, арнайы құттықталды. Бірқатар мекемелер мен ұйымдар со­ғыс және тыл ардагерлерін концерт­­­тік кездесулерге шақырып, майданның сүйікті әндерін естеріне түсіре шыр­қады. Мерекелік сән-салтанат кешкісін көк жүзін сан алуан бояуларға бөлеген отшашулармен жарқырады. Айқын НЕСІПБАЙ, «Егемен Қазақстан». ҚАРАҒАНДЫ.