Ерлер бәсекесінде 22 жастағы Дастан Кенжеғұловтың асқан шеберлігіне тәнті болдық. Еліміздің ең үздік үстел теннисшілерінің рейтингінде төртінші орында тұрған оралдық өрен барлық қарсыласын қапы қалдырып, бас жүлдені олжалады. Финалда ол 20 жасар шымкенттік Ирисбек Артукметовтен айласын асырды. Қарағандылық Владислав Захаров қола медальды мойнына ілді. Әйелдер арасында Шымкент қаласынан келген 17 жасар дарынды спортшы Сарвиноз Миркадированың мерейі үстем болды. Қазақстанның екінші ракеткасы ақтық сында екібастұздық Ангелина Романовскаядан басым түсті. Үшінші орынға Қарағандының өкілі Жанерке Көшкімбаева табан тіреді.
Сонымен қатар Тимофей Герасименко, Даниал Қанатбаев, Валерий Фадеев, Александра Смирнова және Марат Асқаров түрлі аталымдар бойынша арнайы сыйлықтарға ие болды.
