Ішіне отты су түссе, көлік руліне жармасатындардың қарасы әлі сиремей тұр. Қара жол қателікті кешірмейтінін біле тұра мас күйінде көлік жүргізуден бас тартпайтындардың саны күн өткен сайын өрши түспесе, кемитін түрі жоқ. Тексеру жұмыстары тағы да жаға ұстататын көрсеткіштерді анықтап берді. Бар болғаны 22 күннің ішінде мас күйінде көлікті басқарған 75 жүргізуші полиция қызметкерлерінің назарына ілікті.
Мас күйінде бір рет ұсталғаннан кейін сабақ алғанды жөн көрмейтіндер де бар. Деректерге сенсек, ұсталғандардың бірі жол-көлік оқиғасының себепкері болыпты. Ал 5 азамат масаң күйінде қайтадан көлік жүргізуге кірісіп кеткен. Осылайша, олар бір емес, екінші рет ұсталып отыр.
Тұрар Рысқұлов ауданының орталығы Құлан ауылының «Жібек жолы» көшесінде жол-көлік оқиғасы тіркелген. 57 жастағы «Мерседес» автокөлігінің жүргізушісі мейрамхана маңындағы тұраққа қойылған тағы бір «Мерседесті» соққан. Медициналық куәландыру қорытындысы жол-көлік оқиғасына себепкер болған азаматтың орта дәрежеде мас болғанын анықтапты. Бүгінгі таңда аталған дерекке қатысты Қылмыстық кодекстің 346-бабы 2-бөлігімен сотқа дейінгі тергеу амалдары жүргізіліп жатыр. Автокөлік айып тұрағына қойылды.
Тәртіп сақшыларының жедел әрекет етуінің арқасында мас күйінде көлік жүргізген азаматтар дер кезінде ұсталып жатыр. Алғашқы жартыжылдықта 16 азамат көлікті мас күйінде екінші рет жүргізгені үшін қылмыстық жауапкершілікке тартылған. Олардың қатарына тағы да 5 адам қосылып отыр.
Ішімдік ішіп көлік жүргізген 396 өңір тұрғыны бұған дейін де15 тәулікке қамалып, 7 жыл бойы көлік басқару құқығынан айырылған екен.
Жамбыл облысы
