«Қазақстан барысы»: Қызылорда облысы

«Қазақстан барысы» турнирінің төртінші маусымына іріктеу жалғасуда. Жақында Қызылорда  облысынан финалға жолдама алған  балуандар анықталды. Бұл туралы egemen.kz тілшісі хабарлады. Қызылорда облысынан биылғы турнирдің финалдық кезеңіне Руслан Әбдіразақов пен Айбек Серікбаев қатысады. Қазір екеуі де дайындықты бастап кетті. Руслан биылғы іріктеу турнирінде бабында екенін көрсетті. Енді ол финалдық сында бап пен бақ келіссе дейді. Ал оның бауыры 2011 жылғы «Қазақстан барысы» Ұлан Рысқұл жарақатының кесірінен биылғы іріктеуден өте алмады. Биылғы іріктеу турнирінде Қызылорда облысы балуандарға бар жағдайды жасады. Ал облыстық жарыстың соңында жеңімпаз балуандарға тіпті, ақшалай сыйақы да табыс етті. Облыс басшылығы бірінші орын алған Руслан Әбдіразақовқа 1 550 000 теңге, Айбек Серікбаевқа 850 000 теңгені ұстатты. Бұл екеуі де «Қазақстан барысының» финалына екінші рет қатысқалы отыр. -Жеңіске жеткенім үшін қуаныштымын. Бұл жеңіс маған оңай келген жоқ. Бір жыл бұрынғы жарақатым әлі толықтай жазыла қойға жоқ. Әлі күнге дейін сыр беріп тұрады. Бірақ, биыл мені ештеңе де тоқтатпайды. Құдай қаласа, бар күшімді салып чемпион атанғым келеді, - дейді Руслан.

Руслан Әбдіразақовтың лақап аты - «Сыр барысы».

Бойы:  197 см. Салмағы:  117 кг. Туған жылы:  1988 жыл. Спорттық атағы:  қазақ күресінен спорт шебері. Жаттықтырушысы: Садық Мұстафаев. Ал Сыр өңірінен финалдық сынға қатысаты екінші балуан – Айбек Серікбаевтың лақап аты - «Сыр арланы». Оның бойы  190 см, салмағы  103 кг. Айбек 1993 жылы туған. Қазақ күресінен спорт шебері, жаттықтырушысы -  Әділбек Серікбаев. Дастан Кенжалин. Дереккөз: «Қазақстан барысы» қазақ күресін дамыту қорының баспасөз қызметі. Фото: Қазақстан барысы» қазақ күресін дамыту қорының баспасөз қызметі.