Бұл бәсекеде АҚШ-тың EF Education-EasyPost клубының сапындағы 35 жастағы колумбиялық велошабандоз Ригоберто Уран алдына жан салмады. Оның уақыты – 3 сағат 42 минут 28 секунд. Groupama-FDJ ұжымының үздігі Квентин Пачер екінші орын алса, Cofidis командасының мүшесі, испаниялық Хесус Эррада үшінші сатыға табан тіреді. Бұл клубтардың екеуінің де іргетасы Францияда қаланған.
Жалпы есепте біраз өзгеріс бар. Атағы алысқа жайылған Примож Роглич (Jumbo-Visma) үздік үштіктің қатарынан шығып қалды. Словения спортшысының орны Испанияның өкілі Хуан Аюсаға (UAE Team Emirates) бұйырды. Пиреней түбегінің тағы бір өкілі Энрик Мас (Movistar Team) екінші сатыға жайғасты. Ал көш басындағы бельгиялық Ремко Эвенепул (Quick-Step Alpha Vinyl Team) әлі де ешкімге есе жіберер емес. «Астананың» серкесі Мигель Анхель Лопес тағы бір сатыға жоғарылап, бесінші орынды иеленді.
