Дәулеті тасыған боксшылар көшін Флойд Мейвезер бастап тұр. 45 жастағы АҚШ-тың арланы 1996 жылы Атланта Олимпиадасында қола медальды иеленгеннен кейін кәсіпқой рингте күш сынасуға бел буды. Сол аралықта өткізген 50 бәсекенің барлығында жеңіске жетіп, 27 қарсыласын нокаутқа жіберді. Бірнеше салмақ дәрежесі және бірнеше белді нұсқа бойынша чемпиондық белбеуді иеленген Мейвезер ХХІ ғасырдың ең үздік боксшысы деп танылды. Оның әр жекпе-жектен түскен табысы өзге спортшылардың түсіне де кірген емес. Бүгінгі таңда Флойд 450 миллион АҚШ долларына иелік етіп отыр.
Екінші орында – Джордж Форман. Кәсіпқой рингтегі карьерасын америкалық алып сонау 1969 жылы бастады. Ол кезде Джордж жұлқынып тұрған 20 жаста еді. Ал соңғы жекпе-жегін 48 жасында өткізді. 1997 жылдың күзінде «шау тартқан» ардагер боксшы 26 жастағы отандасы Шеннон Бригске ұпай санымен есе жіберді. Бірақ Форман сол сәтсіздікке бола қайғы-мұңға салынған жоқ. Ол рингте жеңіліс тапқанымен, материалдық тұрғыдан мол олжаға кенелді. Кезінде Мұхаммед Әли, Джо Фрейзер, Эвандер Холлифилд, Майкл Мурер сынды аттары аңызға айналған азаматтармен айқасқан «Дәу Джордждың» табысы – 300 миллион доллар.
Үздік үштікті Мэнни Пакьяо түйіндеп тұр. Филиппиннің мақтанышы әрі атымтай жомарт атанған әйгілі былғары қолғап шебері 220 миллионды еншілеп отыр. Сондай-ақ ТОП-10 бақуаттылардың тізіміне мына боксшылар енді: Оскар Де Ла Хойя (200 миллион), Сауль Альварес (180 миллион), Леннокс Льюис (150 миллион), Шугар Рэй Леонард (120 миллион), Владимир Кличко (90 миллион), Энтони Джошуа (80 миллион) және Виталий Кличко (80 миллион).
