Қазақстан құрама командасы мүшелері арасында Аманғали Бекболатов Белградтың бозкілемінде өзін жақсы қырынан көрсетті. 55 кило салмақта сынға түскен қандасымыз бастапқы бәсекелерде болгариялық Недиалко Петров (3:1) пен ирандық Пойа Соулат Дад Марзды (3:1) жеңіп, жартылай финалда грузиялық Нугзари Цурцумиямен күш сынасты. Дәл осы балуан осыдан үш жыл бұрын Нұр-Сұлтанда ұйымдастырылған әлемдік додада біздің Қорлан Жақаншаны бас жүлдеден айырған еді. Одан бөлек Цурцумияның әлем біріншілігінің екі және құрлық чемпионатының үш дүркін жүлдегері деген атағы бар. Бұл тартыста екі ғана ұпай айырмашылығымен грузиялық спортшы жеңіске жетті. Енді Аманғали қола медаль үшін күреседі.
Алғашқы айналымда жапониялық Тайши Хориені (7:3) жеңген 72 кило салмақтағы Ибрагим Магомадов 1/8 финалда әзербайжандық Ульви Ганидзеге (2:4) есе жіберді. Десек те қарсыласы финалға жолдама алғанының арқасында отандасымыз жұбаныш бәсекелерінде белдесуге мүмкіндігін сақтап қалды. Дәл сондай жағдайды Темірлан Шадукаев те басынан кешірді. 77 кило салмақта күрескен жерлесіміз норвегиялық Пер Андерс Куре (8:3) мен германиялық Идрис Ибаевты (11:2) жолынан ығыстырғанымен, ширек финалда мажарстандық Злотан Левайға (0:9) әлі жетпеді. Жартылай финалда Левай сербиялық Виктор Немешті сан соқтырды. Соның нәтижесінде, Темірланның жеңіс тұғырына көтерілуіне тағу бір мүмкіндік туындады.
Ал 87 кило салмақтағы Нұрсұлтан Тұрсынов польшалық Шимон Шимонович (9:0) пен қытайлық Хайтао Кианның (8:0) тас-талқанын шығарғанымен, Мажарстанның тағы бір белді балуаны Давид Лосонзидің (3:13) осал тұсын таба алмады. Лосонзи де алысқа ұзамады. Осылайша, НұрСұлтан үшін бұл жарыс аяқталды.
